*स्व.काकासाहेब हिरालाल मगनलाल चौधरी यांच्या प्रथम पुण्यस्मरणानिमित्त स्मृतीस्थळी भावपूर्ण अभिवादन*
नंदुरबार(प्रतिनिधी):-प्रेरणापुरुष, समाजहितैषी तसेच सामाजिक, राजकीय व शैक्षणिक क्षेत्रातील उल्लेखनीय व्यक्तिमत्त्व स्व. काकासाहेब हिरालाल मगनलाल चौधरी यांच्या प्रथम पुण्यस्मरणानिमित्त हिरा प्रतिष्ठानच्या शालेय प्रांगणातील स्मृतीस्थळी त्यांच्या स्मृतींना भावपूर्ण व भव्य अभिवादन करण्यात आले.
स्व.काकासाहेब चौधरी यांच्या कार्याची आणि विचारांची आठवण जागवत त्यांच्या स्मृतीस्थळी पुष्पांजली अर्पण करून अभिवादन करण्यात आले. यावेळी नंदुरबार शहर तेली समाजाचे पदाधिकारी, हिरा प्रतिष्ठान संस्थेचे सर्व पदाधिकारी व कर्मचारी, शहरातील सामाजिक, राजकीय व व्यापार क्षेत्रातील मान्यवर तसेच चौधरी कुटुंबातील सर्व सदस्य मोठ्या संख्येने उपस्थित होते.स्व. काकासाहेब चौधरी यांनी आपल्या कार्यकाळात सामाजिक बांधिलकी, शैक्षणिक विकास, समाजहित आणि सर्वसामान्यांच्या प्रश्नांप्रती असलेली संवेदनशीलता यांना नेहमीच प्राधान्य दिले. समाजातील विविध घटकांना सोबत घेऊन कार्य करण्याची त्यांची भूमिका आणि सर्वांशी आपुलकीने वागण्याची शैली यामुळे त्यांनी समाजात आपले वेगळे स्थान निर्माण केले.
विशेषतः शैक्षणिक क्षेत्रातील त्यांचे योगदान आणि शिक्षणाच्या माध्यमातून समाजाचा सर्वांगीण विकास साधण्याची त्यांची दूरदृष्टी आजही अनेकांसाठी प्रेरणादायी आहे. हिरा प्रतिष्ठानच्या माध्यमातून शिक्षण क्षेत्रात उभे राहिलेले कार्य त्यांच्या विचारांची आणि सामाजिक बांधिलकीची साक्ष देणारे आहे. विद्यार्थ्यांना गुणवत्तापूर्ण शिक्षण, संस्कार व चांगले नागरिकत्वाचे धडे मिळावेत, यासाठी त्यांनी सातत्याने प्रयत्न केले.
सामाजिक क्षेत्रात काम करताना समाजातील विविध घटकांना एकत्र आणणे, गरजूंच्या अडचणी समजून घेणे आणि समाजाच्या विकासासाठी सकारात्मक भूमिका घेणे ही त्यांची कार्यपद्धती होती. राजकीय व सामाजिक क्षेत्रातही त्यांनी विचारांची स्पष्टता, कार्यकर्त्यांशी असलेले जिव्हाळ्याचे संबंध आणि समाजहिताला केंद्रस्थानी ठेवण्याची भूमिका जपली. त्यांच्या प्रथम पुण्यस्मरणा निमित्त उपस्थित मान्यवरांनी स्व. काकासाहेबांच्या कार्याला उजाळा देत त्यांच्या आठवणींना उजाळा दिला. “व्यक्ती काळाच्या पडद्याआड जाते; मात्र तिचे विचार, कार्य आणि समाजासाठी दिलेले योगदान कायम जिवंत राहते,” या भावनेतून त्यांच्या कार्याचा गौरव करण्यात आला.
स्व. काकासाहेब चौधरी यांनी समाजासाठी निर्माण केलेला विचारांचा, संस्कारांचा आणि सेवाभावाचा वारसा पुढील पिढीने जपून ठेवणे हीच त्यांना खरी आदरांजली ठरेल. त्यांच्या कार्यातून प्रेरणा घेऊन सामाजिक, शैक्षणिक आणि समाजहिताच्या उपक्रमांना अधिक व्यापक स्वरूप देण्याचा संकल्प यावेळी व्यक्त करण्यात आला.
प्रथम पुण्यस्मरणानिमित्त झालेल्या या अभिवादन कार्यक्रमामुळे हिरा प्रतिष्ठानच्या शालेय प्रांगणातील स्मृतीस्थळी स्व. काकासाहेबांच्या कार्याच्या आठवणी पुन्हा एकदा जागृत झाल्या. त्यांच्या विचारांचा आणि कार्याचा प्रेरणादायी वारसा समाजाच्या पुढील पिढ्यांना सदैव मार्गदर्शक ठरेल, अशी भावना उपस्थितांनी व्यक्त केली.