*जोगळेकरांच्या ग्रंथाचे योगेश बुवांच्या हस्ते प्रकाशन*
नाशिक(प्रतिनिधी):-आनंद जोगळेकर लिखित "समजले आणि वर्तले ते चि भाग्य पुरुष झाले " या ग्रंथाचे प्रकाशन श्री समर्थ सेवा मंडळ सज्जनगड चे कार्यवाह समर्थ भक्त योगेश बुवा रामदासी यांचे हस्ते काल ग्रंथराज दासबोधाची गंगोत्री शिवथरघळ येथे झाले.दासबोध सखोल अभ्यास फाउंडेशन परिवाराचा दरवर्षीप्रमाणे मागील 41 वर्षांपासून शिवथरघळीत कोजागिरी पौर्णिमेपासून साधना सप्ताह चालू आहे. देशातल्या पाच राज्यांमधून आलेल्या जवळपास 150 पेक्षा जास्त साधकांच्या  उपस्थितीत या ग्रंथाचे प्रकाशन झाले. यावेळी योगेश बुवा यांनी जोगळेकरांनी हा ग्रंथ सिद्ध करताना गुगल, कृत्रिम बुद्धिमत्ता या आधुनिक तंत्रज्ञानासह जगद्गुरु तुकाराम महाराज, समर्थ रामदास स्वामी, संत सोहिरोबा, संत नामदेव, संत चोखामेळा, संत जनाबाई अशा अनेक महानुभावांच्या वाङ्मयातील संदर्भ घेऊन मानवी जीवन किती उत्तुंग होऊ शकते याचे विवेचन केले आहे असे मत मांडले. संतांच्या अक्षर वाङ्मयातील संदर्भ मानवाच्या दैनंदिन जीवनात ओघवत्या आणि चपखलपणे पद्धतीने पेरले आहेत असे श्री सुंदरमठ सेवा समितीचे विश्वस्त डॉ. विजय लाड यांनी सांगितले.
यावेळी समर्थ रामदास स्वामी साहित्य अध्यासन चे कार्यकारी संचालक संतोष सप्रे उपस्थित होते.
कार्यक्रमाच्या यशस्वीतेसाठी सौ वृंदा जोगळेकर,  सौ. मेधा कुलकर्णी , सौ. शुभदा थिटे, बाळासाहेब पाटील, विनायक विद्वांस, सौ. अपर्णा वांगीकर, सौ. रंजना पाटील यांनी परिश्रम घेतले.