*ना पाठांतराची कटकट, ना नापासाची भीती; ‘उल्लास’अंतर्गत होणार परीक्षा, तीन तासांचा अवधी, दिव्यांगांना अतिरिक्त वेळ*
नंदुरबार(प्रतिनिधी):-येत्या 25 ऑक्टोबर रोजी जिल्ह्यात अनोखा आणि प्रेरणादायी नजारा पाहायला मिळणार आहे. वयाची कोणतीही अट न बाळगता जिल्ह्यातील तब्बल 23839 असाक्षर नागरिक 810 परीक्षा केंद्रावर हातात लेखणी धरून ‘उल्लास’ नवभारत साक्षरता कार्यक्रमांतर्गत पायाभूत साक्षरता व संख्याज्ञान चाचणीच्या मैदानात उतरणार आहेत. हा विषय केवळ परीक्षेपुरता मर्यादित नसून, प्रौढांमधील शिक्षणाची ओढ आणि जिद्द जगासमोर आणणारा एक सामाजिक उत्सव ठरणार आहे. या विशेष परीक्षेमध्ये यावर्षी नव्याने नोंदणी झालेले असाक्षर, यापूर्वी परीक्षा न दिलेले तसेच ‘नीड इम्प्रूव्हमेंट’ असा शेरा मिळालेले परीक्षार्थी सहभागी होणार आहेत. विशेष म्हणजे, ज्या-ज्या शाळांमधून असाक्षरांची नोंदणी करण्यात आली आहे, त्याच शाळा त्यांचे परीक्षा केंद्र असणार आहे. त्यामुळे हक्काच्या आणि परिचयाच्या वातावरणात ही परीक्षा पार पडणार आहे. त्याची तयारीही जिल्हा प्रशासनाकडून करण्यात आलेली आहे.23839
एकूण परीक्षार्थी सहा तालुक्यांमधून आहेत. प्रश्नपत्रिका रचना अन् गुणांचे गणित, ही परीक्षा अत्यंत सुटसुटीत आणि मार्गदर्शक स्वरूपाची असून, प्रश्नपत्रिकेत एकूण तीन विभाग असणार आहेत.
प्रत्येक विभागाला 50 गुण निश्चित करण्यात आले असून, एकूण 150 गुणांची ही चाचणी राहील. परीक्षार्थींना प्रत्येक विभागात उत्तीर्ण होण्यासाठी किमान 16.5 गुण मिळवणे आवश्यक आहे, तर संपूर्ण पत्रिकेसाठी एकूण 49.5 गुण मिळवणे अनिवार्य करण्यात आले आहे. जर कोणाला उत्तीर्ण होण्यासाठी आवश्यक असलेले गुण मिळाले नाहीत, तर त्यांना 5 वाढीव (ग्रेस) गुण देण्याची सोय आहे. दिव्यांग परीक्षार्थींच्या सोयीसाठी एक तास अतिरिक्त,
सकाळी 10 ते सायंकाळी 5 या वेळेत परीक्षार्थी जेव्हा परीक्षा केंद्रावर उपस्थित राहतील, तेव्हापासून त्यांना पेपर सोडवण्यासाठी सविस्तर तीन तासांचा अवधी दिला जाईल. तसेच दिव्यांग परीक्षार्थींच्या सोयीसाठी एक तास अतिरिक्त वेळ वाढवून देण्यात आला आहे, जेणेकरून त्यांना कोणतीही अडचण येणार नाही. सुव्यवस्थित नियोजन, परीक्षा सुरळीत पार पाडावी यासाठी जिल्हाधिकारी मित्ताली सेठी आणि मुख्य कार्यकारी अधिकारी नमन गोयल यांच्या मार्गदर्शनाखाली शिक्षणाधिकारी उर्मिला पारधे यांनी भरारी पथक तयार केले असून तालुक्याचे परीक्षा विषयक कामकाज गटशिक्षणाधिकारी यांच्या समन्वयातून पार पडणार आहे.
शिक्षणाला वयाचे कोणतेही बंधन नाही, हे या उपक्रमाने साध्य होणार आहे. जिल्ह्यातील असाक्षरांनी संकोचाशिवाय परीक्षेत सहभागी होऊन आपले जीवन ज्ञानाच्या प्रकाशाने प्रज्वलित करावे. असे आवाहन योजना शिक्षणाधिकारी उर्मिला पारधी यांनी केले आहे.