*सेवा संकल्प अभियानांतर्गत पिंपरी व भिलाईपाडा येथे आरोग्यविषयक उपक्रम*
नंदुरबार(प्रतिनिधी):-‘माझं गाव आरोग्यसंपन्न गाव’ अभियानांतर्गत ग्रुप ग्रामपंचायत पिंपरी व भिलाईपाडा येथे विविध आरोग्यविषयक उपक्रम राबविण्यात आले.
यावेळी जागतिक मानसिक आरोग्य दिनानिमित्त ग्रामस्थांना मानसिक आरोग्याचे महत्त्व, ताणतणाव व्यवस्थापन आणि मानसिक आरोग्यविषयक समुपदेशन करण्यात आले. या उपक्रमांतर्गत ग्रामस्थांना आरोग्यविषयक मार्गदर्शन करण्यासोबतच तिसऱ्या टप्प्यातील असंसर्गजन्य आजार तपासणी (NCD स्क्रीनिंग) करण्यात आली. मधुमेह, उच्च रक्तदाब यांसारख्या आजारांचे लवकर निदान व्हावे आणि नागरिकांनी आरोग्याबाबत जागरूक राहावे, हा या उपक्रमाचा उद्देश होता. आयुष्मान आरोग्य मंदिर, नांदरखेडा आणि प्राथमिक आरोग्य केंद्र, आष्टे यांच्या माध्यमातून राबविण्यात आलेल्या या उपक्रमाला ग्रामस्थ, ग्रामपंचायत पदाधिकारी तसेच आरोग्य विभागातील अधिकारी व कर्मचाऱ्यांचे सहकार्य लाभले.
‘निरोगी ग्रामस्थ, सशक्त महाराष्ट्र’ या संकल्पनेतून ग्रामस्तरावर आरोग्यविषयक जनजागृतीला चालना देण्याचा प्रयत्न या उपक्रमातून करण्यात आला.