*नंदुरबार जिल्ह्यातून चाऱ्याची परजिल्हा व राज्याबाहेर वाहतूक,विक्रीस सक्त मनाई-जिल्हाधिकारी डॉ.मित्ताली सेठी*
नंदुरबार(प्रतिनिधी):- महाराष्ट्र शासनाच्या मदत व पुनर्वसन विभागाच्या शासन निर्णयानुसार नंदुरबार जिल्ह्यातील सर्व सहा तालुक्यांमध्ये ‘ट्रिगर-1 (प्रथम कळ)’ दुष्काळ घोषित करण्यात आला आहे. पर्जन्यमानातील कमतरतेमुळे जिल्ह्यात विविध मार्गांनी होणारे वैरणीचे उत्पादन कमी होण्याची शक्यता आहे. भविष्यात जिल्ह्यात चारा टंचाई निर्माण झाल्यास पशुधनाच्या उत्पादनक्षमतेवर तसेच त्यांच्या जीवितावर विपरीत परिणाम होऊन कायदा व सुव्यवस्थेचा प्रश्न निर्माण होण्याची शक्यता निर्माण होवून नये यासाठी नंदुरबार जिल्ह्याच्या महसुली हद्दीतून चाऱ्याची परजिल्हा व राज्याबाहेर वाहतूक आणि विक्री करण्यास सक्त मनाई केली आहे. असे आदेश जिल्हाधिकारी तथा जिल्हादंडाधिकारी डॉ. मित्ताली सेठी यांनी  दिले आहेत.
नंदुरबार जिल्ह्याच्या हद्दीतून इतर कोणत्याही जिल्ह्यात अथवा राज्याबाहेर सर्व प्रकारच्या सुक्या व ओला हिरवा चारा, कडबा, कोणत्याही प्रकारची कुट्टी, पेंढा, टीएमआर तसेच इतर पशुखाद्य वाहतूक व विक्री करण्यास सक्त मनाई करण्यात आली आहे. तथापि, शासकीय योजना, पशुसंवर्धन विभाग किंवा जिल्हा प्रशासनाने अधिकृत मंजुरी दिलेल्या चारा वाहतुकीस हा आदेश लागू राहणार नाही.
आदेशाचे उल्लंघन करणाऱ्या व्यक्तींविरुद्ध भारतीय न्याय संहिता, 2023 मधील कलम 223 अन्वये कायदेशीर कारवाई करण्यात येईल. हा आदेश जारी दिनांकापासून पुढील आदेश निर्गमित होईपर्यंत लागू राहणार आहे. जिल्ह्यातील पशुधनासाठी उपलब्ध चारा सुरक्षित राहावा आणि संभाव्य चारा टंचाईची परिस्थिती निर्माण होऊ नये, यासाठी संबंधितांनी या आदेशाचे काटेकोर पालन करावे, असे आवाहन जिल्हा प्रशासनाने केले आहे.