*गांधी जयंतीनिमित्त नंदुरबार नगर परिषदेतर्फे स्वच्छता मोहीम,‘स्वच्छता ही सेवा’ व ‘सेवा संकल्प’अभियानांतर्गत गांधी पुतळा ते बसस्थानक परिसराची स्वच्छता*
नंदुरबार(प्रतिनिधी):-राष्ट्रपिता महात्मा गांधी यांच्या जयंतीनिमित्त नंदुरबार नगर परिषदेच्या वतीने ‘स्वच्छता ही सेवा’ व ‘सेवा संकल्प’ अभियानांतर्गत विशेष स्वच्छता मोहिमेचे आयोजन करण्यात आले. या मोहिमेस भारत पेट्रोलियम कॉर्पोरेशन लिमिटेड (BPCL) यांनी सहकार्य केले. या मोहिमेंतर्गत गांधी पुतळा ते बसस्थानक या मुख्य मार्गासह परिसरात व्यापक स्वच्छता करण्यात आली. नंदुरबार नगर परिषदेचे स्वच्छता कर्मचारी, बीपीसीएलचे अधिकारी व कर्मचारी तसेच महाराष्ट्र राज्य मार्ग परिवहन महामंडळाच्या नंदुरबार आगारातील कर्मचाऱ्यांनी संयुक्तपणे सहभाग घेत संपूर्ण परिसर स्वच्छ केला. यावेळी उपस्थितांनी स्वच्छतेची शपथ घेत शहर स्वच्छ व सुंदर ठेवण्याचा संकल्प केला.
या मोहिमेस विधान परिषद सदस्य आमदार चंद्रकांत रघुवंशी, नंदुरबार नगर परिषदेचे मुख्याधिकारी राहुल वाघ, आरोग्य सभापती प्रितम ढंडोरे, शहर अभियंता गणेश गावित, आरोग्य विभाग प्रमुख युवराज चव्हाण, स्वच्छता निरीक्षक सागर साळुंके यांच्यासह नगर परिषदेचे अधिकारी व कर्मचारी मोठ्या संख्येने उपस्थित होते. महात्मा गांधी यांच्या स्वच्छतेच्या विचारांना उजाळा देत स्वच्छ, सुंदर आणि निरोगी नंदुरबार शहरासाठी नागरिकांनीही स्वच्छता मोहिमेत सक्रिय सहभाग घ्यावा, असे आवाहन यावेळी करण्यात आले.