*सेवा संकल्प अभियानांतर्गत महात्मा गांधी व लालबहादूर शास्त्री जयंतीनिमित्त स्वच्छता मोहीम*
नंदुरबार(प्रतिनिधी):-सेवा संकल्प अभियानांतर्गत एकात्मिक आदिवासी विकास प्रकल्प कार्यालय, नंदुरबार येथे राष्ट्रपिता महात्मा गांधी व माजी पंतप्रधान लालबहादूर शास्त्री यांच्या जयंतीनिमित्त अभिवादन कार्यक्रम तसेच विशेष स्वच्छता मोहिमेचे आयोजन करण्यात आले. प्रकल्प अधिकारी डॉ. चंद्रकांत पवार यांच्या अध्यक्षतेखाली हा कार्यक्रम उत्साहात पार पडला. कार्यक्रमाच्या प्रारंभी प्रकल्प अधिकारी डॉ. चंद्रकांत पवार यांच्या हस्ते महात्मा गांधी व लालबहादूर शास्त्री यांच्या प्रतिमांचे पूजन करून पुष्पहार अर्पण करण्यात आला. यानंतर उपस्थित अधिकारी व कर्मचाऱ्यांनी स्वच्छतेची शपथ घेतली. शपथ विधीनंतर सेवा संकल्प अभियानाच्या अनुषंगाने प्रकल्प कार्यालय व परिसरात विशेष स्वच्छता मोहीम राबविण्यात आली. अधिकारी व कर्मचाऱ्यांनी उत्स्फूर्तपणे श्रमदान करून कार्यालय परिसर स्वच्छ केला.
प्रकल्प अधिकारी डॉ. चंद्रकांत पवार यांनी स्वच्छतेचे महत्त्व अधोरेखित केले. ते म्हणाले, स्वच्छता ही केवळ एका दिवसापुरती मर्यादित न राहता ती आपल्या दैनंदिन जीवनाचा आणि कामकाजाचा अविभाज्य भाग झाली पाहिजे. महात्मा गांधी यांच्या स्वच्छ भारताच्या संकल्पनेला साकार करण्यासाठी प्रत्येकाने आपल्या स्तरावर सातत्याने प्रयत्न करणे आवश्यक आहे.
यावेळी सहायक प्रकल्प अधिकारी देवेंद्र पाटील व योगेश बागल, लेखाधिकारी सुदर्शन पावरा, नियोजन अधिकारी देवरे, कार्यालय अधीक्षिका कौशल्या पाडवी तसेच विस्तार अधिकारी डी. एच. माळी यांची प्रमुख उपस्थिती होती. सेवा संकल्प अभियानांतर्गत आयोजित या स्वच्छता मोहिमेत एकात्मिक आदिवासी विकास प्रकल्प कार्यालयातील अधिकारी, विभागप्रमुख व कर्मचाऱ्यांनी उत्स्फूर्त सहभाग नोंदवून श्रमदान केले.