*राजापूरच्या मूर तांबळवाडीत  ऐतिहासिक निर्णय, वेदनादायी विधवा प्रथा बंद*
राजापूर(प्रतिनिधी):-तालुक्यातील मूर-तांबळवाडी ग्रामस्थांनी एक ऐतिहासिक आणि पुरोगामी सामाजिक निर्णय घेतला आहे. गावात वाडीपुरती चालत आलेली अनिष्ट विधवा प्रथा बंद करण्याचा ठराव सर्वानुमते घेण्यात आला आहे. या प्रथेनुसार पतीच्या निधनानंतर मृतदेहासमोरच विधवा स्त्रीचे अलंकार उतरवणे, कुंकू पुसणे यासारखे वेदनादायी आणि अमानवीय प्रकार केले जात होते. ही प्रथा अत्यंत दुःखदायक असल्याने ती कायमची बंद करण्याचा निर्णय ग्रामस्थांनी घेतला आहे. मुंबई मंडळाचे अध्यक्ष प्रकाश बारगोडे, प्रकाश यद्रुक, सचिव विलास पवार, विजय बने, राजेश बने, विजय पवार, रघुनाथ गुंडये या मान्यवरांच्या तसेच मुंबई व स्थानिक ग्रामस्थांच्या उपस्थितीत झालेल्या बैठकीत हा ऐतिहासिक निर्णय घेण्यात आला. यावेळी बोलताना ग्रामस्थांनी सांगितले की, "हा बदल होणं ही काळाची गरज आहे. असा निर्णय गावोगावी होणं फार गरजेचं आहे. तरच खऱ्या अर्थाने स्त्री सक्षमतेला आणि स्त्री सन्मानाला चालना मिळेल."
मूर-तांबळवाडीच्या या पुरोगामी निर्णयाचे सर्व स्तरातून कौतुक होत आहे.