*‘श्रीगणेशा आरोग्याचा’ अभियानाला नागरिकांचा उत्स्फूर्त प्रतिसाद,जिल्ह्यात 20 हजार 608 नागरिकांची आरोग्य तपासणी*
नंदुरबार(प्रतिनिधी):-गणेशोत्सवाच्या पार्श्वभूमीवर मुख्यमंत्री सहाय्यता निधी व धर्मादाय रुग्णालय मदत कक्षाच्या माध्यमातून राबविण्यात येत असलेल्या ‘श्रीगणेशा आरोग्याचा’ अभियानाला जिल्ह्यात उत्स्फूर्त प्रतिसाद मिळत आहे. 22 सप्टेंबर 2026 पर्यंत जिल्ह्यात विविध ठिकाणी 468 आरोग्य शिबिरांचे आयोजन करण्यात आले असून, या शिबिरांमध्ये 20 हजार 608 नागरिकांची आरोग्य तपासणी करण्यात आली आहे, अशी माहिती मुख्यमंत्री सहाय्यता निधी व धर्मादाय रुग्णालय मदत कक्षाचे डॉ. तुषार धामणे यांनी एका प्रसिद्धी पत्रकान्वये दिली आहे. मुख्यमंत्री देवेंद्र फडणवीस यांच्या संकल्पनेतून आणि मुख्यमंत्री सहाय्यता निधी व धर्मादाय रुग्णालय मदत कक्षाचे प्रमुख रामेश्वर नाईक यांच्या पुढाकारातून हे अभियान जिल्ह्यात राबविण्यात येत आहे. आरोग्य तपासणी करण्यात आलेल्यांमध्ये 8 हजार 153 पुरुष, 9 हजार 261 महिला आणि 3 हजार 194 बालकांचा समावेश आहे. अभियानांतर्गत मेडिसिन/कार्यचिकित्सा विभागात 6 हजार 527, हृदयविकार विभागात 122, अस्थिविकार विभागात 407, बालरोग विभागात 1 हजार 103, स्त्रीरोग विभागात 853, कान-नाक- घसा विभागात 197, नेत्रविकार विभागात 220, त्वचाविकार विभागात 255, इतर व्याधींसाठी 579 तसेच शल्यतंत्र विभागात 196 नागरिकांची तपासणी करण्यात आली.
अभियानादरम्यान 3 हजार 829 रक्ततपासण्या आणि 653 ईसीजी तपासण्या करण्यात आल्या. तसेच 1 हजार 105 आयुष्मान/आभा कार्ड नोंदणी, 140 गोल्डन कार्ड तसेच 76 रक्तदात्यांची नोंदणी करण्यात आली. अभियानाच्या प्रभावी अंमलबजावणी साठी जिल्हाधिकारी डॉ. मित्ताली सेठी, निवासी उपजिल्हाधिकारी आशा संघवी, जननायक बिरसा मुंडा शासकीय वैद्यकीय महाविद्यालयाचे अधिष्ठाता डॉ. संजय राठोड, जिल्हा शल्यचिकित्सक डॉ. विनय सोनवणे आणि जिल्हा आरोग्य अधिकारी डॉ. रविंद्र सोनवणे यांचे मार्गदर्शन लाभत आहे.
जिल्ह्यातील नोंदणीकृत गणेश मंडळे, मुख्यमंत्री सहाय्यता निधी व धर्मादाय रुग्णालय मदत कक्षाशी संलग्न रुग्णालये, जननायक बिरसा मुंडा शासकीय वैद्यकीय महाविद्यालय व रुग्णालय, जिल्हा रुग्णालय, जिल्हा परिषद आरोग्य विभाग, डी.पी. गावित आयुर्वेद महाविद्यालय व रुग्णालय, पथराई, धर्मादाय रुग्णालये, राष्ट्रीय बाल स्वास्थ्य कार्यक्रम तसेच महात्मा ज्योतिबा फुले जनआरोग्य योजना संलग्न रुग्णालयांच्या संयुक्त सहकार्याने या आरोग्य शिबिरांचे आयोजन करण्यात येत आहे.