*सैय्यद फरहत हुसैन यांची पुनश्च एमआयएम नंदुरबार जिल्हाध्यक्षपदी निवड*
नंदुरबार(प्रतिनिधी):-ऑल इंडिया मजलिस-ए-इत्तेहादुल मुस्लिमीन (AIMIM) च्या नंदुरबार जिल्हा अध्यक्षपदी सैय्यद फरहत हुसैन यांची पुन्हा एकदा निवड करण्यात आली आहे. या संदर्भातील अधिकृत माहिती एमआयएम महाराष्ट्र प्रदेशाध्यक्ष तथा माजी खासदार इम्तियाज जलील साहेब यांनी आपल्या अधिकृत सोशल मीडिया पेजवरून दिली आहे. इम्तियाज जलील यांनी सैय्यद फरहत हुसैन यांना या नव्या जबाबदारीबद्दल मनापासून शुभेच्छा देत त्यांच्या पुढील यशस्वी वाटचालीसाठी शुभेच्छा व्यक्त केल्या. फरहत हुसैन यांच्या पुनर्निवडीची बातमी समजताच नंदुरबार जिल्ह्यातील एमआयएमचे पदाधिकारी व कार्यकर्त्यांमध्ये उत्साहाचे वातावरण निर्माण झाले आहे. कार्यकर्त्यांनी या निर्णयाचे उत्स्फूर्त स्वागत करत, त्यांच्या नेतृत्वात जिल्ह्यात पक्ष अधिक मजबूत, सक्रिय आणि तळागाळापर्यंत पोहोचेल असा विश्वास व्यक्त केला. पक्ष संघटना बूथ स्तरावर मजबूत करणे, सर्वसामान्य जनतेच्या समस्यांना वाचा फोडणे आणि गरजूंना न्याय मिळवून देणे ही आगामी काळातील मुख्य उद्दिष्टे असतील, असे कार्यकर्त्यांनी सांगितले.
आपल्या निवडीबद्दल बोलताना सैय्यद फरहत हुसैन यांनी वरिष्ठ नेतृत्वाचे आभार मानले. "पार्टीने माझ्यावर दाखवलेला विश्वास आणि दिलेली जबाबदारी मी पूर्ण निष्ठेने व प्रामाणिकपणे पार पाडीन," असा कौल देत त्यांनी जिल्ह्यातील सर्व पदाधिकारी व कार्यकर्त्यांना एकसंध होऊन काम करण्याचे आवाहन केले.
विशेष उल्लेखनीय म्हणजे, सैय्यद फरहत हुसैन यांच्याच नेतृत्वात नंदुरबार नगरपालिकेत एमआयएमने जोरदार मुसंडी मारत 6 पैकी 4 जागांवर दणदणीत विजय मिळवून आपले खाते उघडले होते. त्यामुळे त्यांची ही नियुक्ती नंदुरबार जिल्ह्यातील पक्षाच्या विस्तारासाठी अत्यंत महत्त्वाची मानली जात आहे.