*ओणी येथील फ्लायओव्हर ब्रिजला झाडे आली, पुलाच्या कामाचे ऑडिट करण्याची जनतेची मागणी*
ओणी(प्रतिनिधी):-राजापूर तालुक्यातील मौजे ओणी येथील मुंबई गोवा हायवे वरील फ्लायओव्हर ब्रिजला झाडे आल्याने आता हा पूल वाहतुकीस कितपत योग्य आहे असा सवाल उपस्थित होत असून या पुलाच्या कामाचे रीतसर स्ट्रक्चरल ऑडिट करण्यात यावे अशी मागणी जनतेमधून करण्यात येत आहे. मुंबई गोवा राष्ट्रीय महामार्गाच्या चौपदरीकरण कामाच्या वेळेस ओणी येथे फ्लायओव्हर ब्रीज उभारण्यात आला. मात्र आता या पुलावर मोठ्या प्रमाणावर झाडे रुजून ती झाडे मोठी झाली आहेत. त्यामुळे त्या झाडांची पाळेमुळे कदाचित पुलामध्ये खोलवर रुजून आली असावीत. त्यामुळे हा पूल कोसळणार तर नाही ना? पूल कोसळण्याच्या स्थितीत तर नाही ना. यासाठी काळजी म्हणून राष्ट्रीय महामार्ग प्राधिकरणाने या पुलाचे ऑडिट करावे अशी मागणी होत आहे. ओणी येथे मुख्य मार्गालगत अनेक वाड्या आहेत. ओणीतून चुनाकोळवण, शिवणे बुद्रुक, गीतये वाडी, वडद हसोळ आदी गावात जाण्यासाठी जोडरस्ता आहे. तिथून अनेक लोक ओणी बाजारपेठेत येत असतात. शिवाय ओणीतून पाचल, रायपाटण, अणुस्कुरा मार्गे देखील वाहनांची वर्दळ असते. राजापूर ते रत्नागिरीकडे जाण्यासाठी याच फ्लायओव्हर ब्रिजचा सर्वाधिक वापर होत आहे. गोवा, सिंधुदुर्गकडून येणारी आणि मुंबईकडे जाणारी वाहने याच फ्लायओव्हर ब्रिजवरून सतत ये-जा करत असतात. मालवाहतूक गाड्या देखील जात असतात. त्यामुळे या सगळ्याचा अभ्यास करून राष्ट्रीय महामार्ग विभागाने याकडे लक्ष द्यावे अशी मागणी करण्यात येत आहे.