*राधा-कृष्ण सेवा मंडळ तळेकरवाडी, कळसवली येथे श्रीकृष्ण जन्माष्टमीनिमित्त टिपरी फुगडीचा जंगी सामना* 
राजापूर(प्रतिनिधी):-तालुक्यातील मौजे कळसवली राधाकृष्ण सेवा मंडळ, तळेकरवाडी यांच्या वतीने श्रीकृष्ण जन्माष्टमीनिमित्त विविध सांस्कृतिक कार्यक्रमांचे आयोजन करण्यात आले आहे. यानिमित्त महिला टिपरी नृत्याचा जंगी सामना आयोजित करण्यात आला आहे. 4 सप्टेंबर रोजी रात्री 9 वाजता राधाकृष्ण मंदिर (तळेकरवाडी) येथे हा रंगतदार कार्यक्रम उत्साहात पार पडणार आहे. यावेळी कोकणातील पारंपरिक टिपरी फुगडी नृत्याची जुगलबंदी पाहण्याची संधी ग्रामस्थ व रसिकांना मिळणार आहे.
‌सदर सामना हा श्रीमहालक्ष्मी टिपरी नृत्य, गोतावडेवाडी, मु. पो. ओणी (कोंडीवळे) पथकाच्या शक्तीवाली शाहीर  कु. ऐश्वर्या प्रशांत गोतावडे विरुद्ध श्री सोळजाई टिपरी नृत्य, देवरुख पथकाच्या तुरेवाली शाहीरा कु. दक्षता लाड असून य दोन नामांकित फुगडी नृत्य संघात सामना रंगणार आहे. कोकणातील पारंपरिक लोककला, संस्कृती आणि फुगडी-टिपरी नृत्याची समृद्ध परंपरा जपण्याच्या उद्देशाने या कार्यक्रमाचे आयोजन करण्यात आले आहे. या रंगतदार सांस्कृतिक सोहळ्याचा आनंद घेण्यासाठी ग्रामस्थ व रसिकांनी मोठ्या संख्येने उपस्थित राहावे, असे आवाहन राधाकृष्ण सेवा मंडळ, तळेकरवाडी यांच्या वतीने करण्यात आले आहे. "आपली लोककला, आपली संस्कृती आणि आपली परंपरा जपूया!” या भावनेतून तळेकरवाडीत हा सांस्कृतिक सोहळा आयोजित करण्याचा हेतू असल्याचे आयोजकांनी म्हटले आहे.