*ग्यान प्रकाश फाउंडेशनच्या माध्यमातून डायट नंदुरबारमध्ये क्षमता आधारित शिक्षणाला चालना*
नंदुरबार(प्रतिनिधी):-मुलभूत साक्षरता व संख्याज्ञान अभियानाच्या प्रभावी अंमलबजावणीसह शैक्षणिक गुणवत्तावाढीसाठी केंद्रस्तरावरील शैक्षणिक कामकाज अधिक सक्षम व सुसूत्र करण्याच्या उद्देशाने जिल्हा शिक्षण व प्रशिक्षण संस्था नंदुरबार येथे जिल्हास्तरीय क्षमता आधारित शिक्षण कार्यशाळेचे आयोजन करण्यात आले. ग्यान प्रकाश फाउंडेशन, जिल्हा शिक्षण व प्रशिक्षण संस्था आणि शिक्षण विभाग, नंदुरबार यांच्या संयुक्त विद्यमाने कार्यशाळा पार पडली. शहादा व तळोदा तालुक्यातील समूह साधन केंद्र समन्वयक तसेच केंद्र संसाधन गटातील सीआरजी सदस्य या कार्यशाळेस उपस्थित होते. उर्वरित अक्कलकुवा, धडगाव, नवापूर, नंदुरबार तालुक्यातील प्रशिक्षण संपन्न होणार आहे. केंद्रस्तरीय शैक्षणिक नियोजन, क्षमता -आधारित शिक्षण, केंद्र संसाधन गटाचे कार्य, शिक्षण परिषदेचे प्रभावी नियोजन आणि शैक्षणिक प्रक्रियेत समाजाचा सहभाग या विषयांवर कार्यशाळेत ग्यान प्रकाश फाउंडेशनचे राज्य समन्वयक मधुकर माने यांनी मार्गदर्शन करण्यात आले.
केंद्र संसाधन गट हा केंद्रप्रमुखांना शैक्षणिक गुणवत्ता सुधारण्यासाठी सहाय्य करणारा महत्त्वपूर्ण गट असून, भाषा, इंग्रजी, गणित, विज्ञान, सामाजिक शास्त्र आणि आयसीटी या विषयांतील उपक्रमशील व विषयतज्ज्ञ शिक्षकांचा त्यात समावेश असतो. शिक्षकांच्या शैक्षणिक गरजा ओळखणे, नाविन्यपूर्ण अध्ययन-अध्यापन पद्धतींची देवाणघेवाण करणे, शाळांना आवश्यक शैक्षणिक मार्गदर्शन करणे तसेच शिक्षण परिषद प्रक्रियेत सुलभकाची भूमिका बजावणे, या सीआरजी च्या प्रमुख जबाबदाऱ्यांवर कार्यशाळेत विशेष भर देण्यात आला.
यावेळी क्षमता -आधारित शिक्षण, निपुण भारत व निपुण महाराष्ट्र, पायाभूत चाचणीचे विश्लेषण, विद्यार्थी प्रगतीचा आढावा, शैक्षणिक साहित्याचा प्रभावी वापर, पालक सहभाग, वर्ग नियोजन, शाळा व्यवस्थापन समितीची भूमिका आणि शैक्षणिक ग्रामसभा आदी विषयांवर चर्चा करण्यात आली. केंद्राच्या शैक्षणिक गरजांनुसार नियोजन करून त्याची प्रभावी अंमलबजावणी करण्यासाठी केंद्र समन्वयक व सीआरजी सदस्यांनी समन्वयाने काम करण्याची गरज अधोरेखित करण्यात आली. मुख्य कार्यकारी अधिकारी नमन गोयल, जिल्हा परिषद नंदुरबार प्राथमिक शिक्षणाधिकारी श्रीमती क्रांती आरसूड यांच्या मार्गदर्शनाखाली
कार्यशाळेत जिल्हा शिक्षण व प्रशिक्षण संस्थेचे प्राचार्य दिपक साबळे, ग्यान प्रकाश फाउंडेशन राज्य समन्वयक मधुकर माने, ज्येष्ठ अधिव्याख्याता प्रतिभा भावसार, अधिव्याख्याता प्रदीप पाटील, ग्यान प्रकाश फाउंडेशनच्या जिल्हा समन्वयक क्रांती सोनवणे, अधिव्याख्याता विनोद लवांडे, ग्यान प्रकाश फाउंडेशनचे संदीप जावरे, प्रकाश लांबोळे आदींनी मार्गदर्शन केले.
राष्ट्रीय शिक्षण धोरण 2020 मध्ये अपेक्षित असलेल्या समाज सहभागाच्या अनुषंगाने पालक, ग्रामपंचायत, शाळा व्यवस्थापन समिती आणि शैक्षणिक यंत्रणा यांच्यात समन्वय वाढविण्याची आवश्यकता यावेळी जिल्हा शिक्षण व प्रशिक्षण संस्थांच्या अधिव्याख्याता प्रतिभा भावसार यांनी व्यक्त करण्यात आली. मुलांच्या शिकण्याच्या प्रक्रियेत पालकांचा सहभाग वाढविणे, शाळांच्या शैक्षणिक गरजा ओळखणे आणि स्थानिक पातळीवर उपलब्ध संसाधनांचा प्रभावी वापर करणे, यामुळे शाळांच्या सर्वांगीण विकासाला चालना मिळू शकते, डायट अधिव्याख्याता प्रदीप पाटील यांनी  मार्गदर्शन करण्यात आले.
मुलभूत साक्षरता व संख्याज्ञान अभियानाच्या यशस्वीतेसाठी ग्यान प्रकाश फाउंडेशन जिल्हा शिक्षण व प्रशिक्षण संस्था व शिक्षण विभाग, नंदुरबार यांच्या सहकार्याने शैक्षणिक गुणवत्तावाढीसाठी कार्यरत आहे. या कार्यशाळेमुळे केंद्र समन्वयक व सीआरजी सदस्यांना क्षमता -आधारित शिक्षणाच्या प्रभावी अंमल बजावणीसाठी दिशा मिळाली असून, त्याचा लाभ केंद्रातील शिक्षक व विद्यार्थ्यांच्या शैक्षणिक प्रगतीसाठी होणार आहे. असेही मत सीआरजी सदस्य गोपाल गावीत यांनी सांगितले.