*माजी सैनिक व विधवांच्या पाल्यांसाठी शैक्षणिक शिष्यवृत्ती जाहीर*
नंदुरबार(प्रतिनिधी):-जिल्ह्यातील माजी सैनिक, विधवा तसेच युद्धविधवा यांच्या पाल्यांसाठी कल्याणकारी निधीमधून शैक्षणिक वर्ष 2026-27 करीता शैक्षणिक शिष्यवृत्ती मंजूर करण्यात येणार आहे. या शिष्यवृत्ती योजनेचा लाभ जिल्ह्यातील पात्र पाल्यांनी घ्यावा, असे आवाहन जिल्हा सैनिक कल्याण अधिकारी मेजर (डॉ.) निलेश प्रकाश पाटील (नि.) यांनी एका शासकीय प्रसिद्धी पत्रकान्वये केले आहे. सदर शैक्षणिक शिष्यवृत्तीसाठी ज्या पाल्यांनी शैक्षणिक वर्ष 2025-26 मध्ये इयत्ता 10 वी, इयत्ता 12 वी, पदविका (Diploma) किंवा पदवी (Degree) परीक्षेत किमान 60 टक्के किंवा त्यापेक्षा जास्त गुण प्राप्त केले आहेत आणि पुढील शिक्षणासाठी प्रवेश घेतला आहे, असे विद्यार्थी पात्र असणार आहेत.
शिष्यवृत्तीसाठीचे अर्ज 10 नोव्हेंबर, 2026 पर्यंत स्वीकारले जातील. ज्या विद्यार्थ्यांनी नीट (NEET), जेईई (JEE), किंवा इतर कारणांसाठी शैक्षणिक खंड (गॅप) घेऊन शैक्षणिक वर्ष 2026-27 मध्ये प्रथम वर्षासाठी प्रवेश घेतला आहे, अशा विद्यार्थ्यांनी अर्जासोबत गॅप/स्वयंघोषणापत्र (Self-Declaration) सादर करणे आवश्यक आहे.
जिल्ह्यातील सर्व माजी सैनिक, विधवा व युद्धविधवा यांनी आपल्या पाल्यांसाठी या कल्याणकारी योजनेचा जास्तीत जास्त लाभ घ्यावा, असेही जिल्हा सैनिक कल्याण अधिकारी मेजर (डॉ.) पाटील यांनी शासकीय प्रसिद्धी पत्रकान्वये कळविले आहे.