*कोकण सह्याद्री ट्रेकर्स ग्रुपची किल्ला हरिश्चंद्र गड चढाई मोहीम यशस्वीरित्या संपन्न*
रत्नागिरी(प्रतिनिधी):-कोकण सह्याद्री ट्रेकर्स (रत्नागिरी) ग्रुपच्या वतीने नुकतेच सह्याद्रीतील ऐतिहासिक आणि आव्हानात्मक समजल्या जाणाऱ्या 'हरिश्चंद्रगड' ट्रेकचे यशस्वी आयोजन करण्यात आले होते. या मोहिमेत महाराष्ट्राच्या विविध भागांतून आलेल्या अनेक दुर्गप्रेमी आणि ट्रेकर्सनी उत्साहाने सहभाग घेतला होता. दि. 2 जुलै 2026 गुरुवारी पहाटे ट्रेकर्सच्या या मोहिमेला सुरुवात झाली. निसर्गरम्य वातावरण, अंगावर येणारे धुके आणि थंड हवेच्या झुळकांचा आनंद घेत सर्व ट्रेकर्सनी गडाची चढाई सुरू केली. वाटेतील निसर्गसौंदर्य न्याहाळत सर्वांनी  गडावर प्रवेश केला
गडावरील ऐतिहासिक हरिश्चंद्रेश्वर मंदिर, केदारेश्वर गुहा आणि सप्ततीर्थ पुष्करणी या ऐतिहासिक ठिकाणांना सर्वांनी भेटी दिल्या. दुपारच्या वेळी गडाचा मुख्य आकर्षण असलेला आणि तब्बल 1800 फूट सरळ असणारा 'कोकणकडा' ट्रेकर्सनी अनुभवला. येथील सूर्यास्त आणि दरीतून येणारी वाऱ्याची प्रचंड झुळूक पाहून सर्व ट्रेकर्स मंत्रमुग्ध झाले. कोकणकडा वरील दृश्य अनुभवल्यानंतर या मोहिमेची यशस्वी सांगता झाली. "सह्याद्रीचा इतिहास आणि निसर्ग जवळून अनुभवता यावा तसेच तरुणांमध्ये गडकिल्ल्यांविषयी आवड निर्माण व्हावी या उद्देशाने या ट्रेकचे आयोजन केले होते. अशी माहिती कोकण सह्याद्री ट्रेकर्स ग्रुपच्या प्रमुखांनी दिली. संपूर्ण ट्रेक दरम्यान सुरक्षिततेची विशेष काळजी घेण्यात आली होती. हा थरारक आणि अविस्मरणीय अनुभव दिल्याबद्दल सर्व सहभागी ट्रेकर्सनी ग्रुपचे आभार मानले.