*डॉ. बाबासाहेब आंबेडकर शासकीय वसतिगृहात प्रवेशासाठी 15 जुलैपर्यंत ऑनलाइन अर्ज करण्याचे आवाहन, अनुसूचित जाती, अनुसूचित जमाती, विमुक्त जाती-भटक्या जमाती, इमाव, दिव्यांग, अनाथ व आर्थिकदृष्ट्या मागास विद्यार्थ्यांसाठी मोफत निवासी सुविधा*
नंदुरबार(प्रतिनिधी):-भारतरत्न डॉ. बाबासाहेब आंबेडकर शासकीय वसतिगृह, धर्मराज नगर, नंदुरबार येथे कनिष्ठ महाविद्यालयात शिक्षण घेणाऱ्या विद्यार्थ्यांसाठी प्रवेश प्रक्रिया सुरू झाली असून, अनुसूचित जाती, अनुसूचित जमाती, विमुक्त जाती-भटक्या जमाती, इतर मागासवर्ग, आर्थिकदृष्ट्या दुर्बल घटक, दिव्यांग तसेच अनाथ प्रवर्गातील पात्र विद्यार्थ्यांनी 15 जुलै, 2026 पर्यंत ऑनलाइन पद्धतीने अर्ज करावेत, असे आवाहन वसतिगृहाचे गृहपाल टी. एन. गिरासे यांनी केले आहे. शासनाच्या वतीने विद्यार्थ्यांना गुणवत्तापूर्ण शिक्षणासाठी आवश्यक निवासी सुविधा उपलब्ध करून देण्याच्या उद्देशाने या शासकीय वसतिगृहात विद्यार्थ्यांना पूर्णपणे विनामूल्य प्रवेश दिला जातो. ग्रामीण, आदिवासी व आर्थिकदृष्ट्या दुर्बल कुटुंबातील विद्यार्थ्यांना शिक्षणासाठी सक्षम वातावरण मिळावे, यासाठी विविध सुविधा येथे उपलब्ध करून देण्यात आल्या आहेत. 
वसतिगृहात प्रवेशित विद्यार्थ्यांना निवास, नाश्ता, भोजन, अंथरूण -पांघरूण, निर्वाह भत्ता, स्टेशनरी भत्ता, गणवेश भत्ता, सहल भत्ता, सुसज्ज वाचनालय, व्यायाम साहित्य तसेच क्रीडा साहित्य अशा विविध सुविधा शासनामार्फत पुरविण्यात येतात. त्यामुळे विद्यार्थ्यांचा शैक्षणिक, बौद्धिक आणि सर्वांगीण विकास साधण्यास मोठी मदत होते. 
प्रवेशासाठी इच्छुक विद्यार्थ्यांनी www.hmasnew.mahait.org  या संकेतस्थळावर ऑनलाइन अर्ज सादर करावा. अर्ज सादर करण्याची अंतिम मुदत 15 जुलै, 2026 असून, पात्र विद्यार्थ्यांनी अंतिम मुदतीपूर्वी अर्ज सादर करून या सुविधेचा लाभ घ्यावा, असे आवाहन करण्यात आले आहे. 
प्रवेशासंदर्भात अधिक माहितीसाठी गृहपाल, भारतरत्न डॉ. बाबासाहेब आंबेडकर शासकीय वसतिगृह, धर्मराज नगर, नंदुरबार येथे संपर्क साधावा किंवा टी. एन. गिरासे (मो. 9022693551) यांच्याशी संपर्क साधावा, असेही प्रसिद्धीपत्रकात नमूद करण्यात आले आहे.