*आंतरराष्ट्रीय योग दिन उत्साहात साजरा*
नंदुरबार(प्रतिनिधी):-एस. एस. एम. ट्रस्ट संचलित एस. ए. मिशन इंग्लिश मीडियम हायस्कूल, नंदुरबार येथे 21 जून रोजी आंतरराष्ट्रीय योग दिन मोठ्या उत्साहात व शिस्तबद्ध वातावरणात साजरा करण्यात आला. या कार्यक्रमात शिक्षक व विद्यार्थ्यांनी मोठ्या संख्येने उपस्थित राहून उत्स्फूर्त सहभाग नोंदविला.
कार्यक्रमाच्या प्रारंभी शाळेचे प्राचार्य पराग पोळ यांनी विद्यार्थ्यांना योग दिनाचे महत्त्व, योगाचे शारीरिक व मानसिक आरोग्यासाठी असलेले फायदे तसेच दैनंदिन जीवनात योगाचे स्थान याविषयी मार्गदर्शन केले. यावेळी शाळेचे पर्यवेक्षक सबस्टीन जयकर तसेच इंग्रजी प्राथमिक विभागाचे प्राचार्य संदेश यंगड, के. जी. विभागाच्या मुख्याध्यापिका रोहिणी वळवी, उपस्थित होते.
क्रीडा शिक्षक व योग प्रशिक्षक आशिष वळवी आणि पर्यवेक्षक सबस्टीन जयकर यांनी विद्यार्थ्यांना विविध योगासने व प्राणायामाची प्रात्यक्षिके करून दाखविली. यामध्ये ताडासन, वृक्षासन, त्रिकोणासन, भुजंगासन, वज्रासन, पद्मासन, पवनमुक्तासन, सूर्यनमस्कार तसेच अनुलोम- विलोम, कपाल भारती व भ्रामरी प्राणायाम या योगप्रकारांचा समावेश होता. विद्यार्थ्यांनीही उत्स्फूर्तपणे सहभाग घेत योगासने व प्राणायामाची प्रात्यक्षिके सादर केली. योगामुळे शरीर निरोगी, मन प्रसन्न आणि एकाग्रता वाढण्यास मदत होते, असा संदेश यावेळी देण्यात आला. संपूर्ण कार्यक्रम उत्साहपूर्ण वातावरणात पार पडला. कार्यक्रमाचे सूत्रसंचालन व आभार प्रदर्शन मिसेस रोशनी शिरसाठ यांनी केले. कार्यक्रम यशस्वी होण्यासाठी क्रीडा शिक्षक आशिष वळवी, अजय वळवी यांनी परिश्रम घेतले.