*जादूटोणा प्रतिबंधक कायद्यावर प्रशिक्षण कार्यशाळा संपन्न, अंधश्रद्धा निर्मूलनाची सामूहिक शपथ*
नंदुरबार(प्रतिनिधी):-अंधश्रद्धा, जादूटोणा आणि अघोरी प्रथांचे समाजातून उच्चाटन करण्यासाठी येथील जिल्हाधिकारी कार्यालयातील जिल्हा नियोजन भवन येथे एक विशेष प्रशिक्षण कार्यशाळा उत्साहात संपन्न झाली. 'महाराष्ट्र नरबळी आणि इतर अमानुष, अनिष्ट व अघोरी प्रथा व काळी जादू प्रतिबंध व उच्चाटन अधिनियम, 2013' (जादूटोणा प्रतिबंधक कायदा) या विषयावर ही कार्यशाळा आयोजित करण्यात आली होती, अशी माहिती समाज कल्याण सहाय्यक आयुक्त सुंदरसिंग वसावे यांनी एका शासकीय प्रसिद्धी पत्रकान्वये कळविली आहे.
कार्यक्रमाची सुरुवात दीपप्रज्वलन करून आणि महापुरुषांच्या प्रतिमेस अभिवादन करून करण्यात आली. या कार्यशाळेला जिल्ह्यातील शासकीय व निमशासकीय कार्यालयांमधील अधिकारी, कर्मचारी आणि सरकारी अभियोक्ता मोठ्या संख्येने उपस्थित होते. कायद्याचे उद्दिष्ट आणि स्वरूप, जिल्हा विधी सेवा प्राधिकरण समितीचे सरकारी अभियोक्ता भाईदास बिरारे यांनी उपस्थित कर्मचाऱ्यांना या कायद्याच्या विविध पैलूंवर सविस्तर मार्गदर्शन केले. त्यांनी कायद्याच्या मुख्य उद्देशांवर प्रकाश टाकला, ज्यामध्ये खालील मुद्द्यांचा समावेश होता: अंधश्रद्धा व अमानुष प्रथांना आळा: समाजात चालणाऱ्या अंधश्रद्धा, जादूटोणा, काळी जादू, नरबळी आणि अमानुष प्रथा रोखणे.
फसवणूक व अत्याचार थांबवणे, सामान्य जनतेची होणारी आर्थिक व मानसिक फसवणूक थांबवणे आणि महिला, मुले व वृद्धांवर होणारे अत्याचार रोखणे.
वैज्ञानिक दृष्टिकोनाचा प्रसार: लोकांच्या भीती आणि अज्ञानाचा गैरफायदा घेणाऱ्यांवर कडक कारवाई करणे आणि संविधानातील कर्तव्यानुसार वैज्ञानिक दृष्टिकोन वाढवणे. हक्कांचे संरक्षण: मानवी प्रतिष्ठा आणि नागरिकांच्या मूलभूत हक्कांचे संरक्षण करणे.
अनिष्ट प्रथांविरोधात तक्रार करण्याचे आवाहन, बिरारे यांनी कायद्याचे स्वरूप समजावून सांगताना स्पष्ट केले की, हा कायदा नरबळी, भूतबाधा उतरवण्याच्या नावाखाली केली जाणारी मारहाण, चमत्कारांचे खोटे दावे करून फसवणूक करणे, महिलांना डायन किंवा चेटकीण ठरवणे, अघोरी उपचार, जादूटोणा आणि साप चावल्यावर वैद्यकीय उपचार नाकारून झाडफूक करणे अशा सर्व अमानुष बाबींना कडक विरोध करतो. "आपल्या सभोवताली अशा घटना घडत असल्यास नागरिकांनी तात्काळ संबंधित पोलीस स्टेशनमध्ये तक्रार नोंदवावी," असे आवाहनही त्यांनी केले. सामूहिक शपथ आणि सांगता, या कार्यशाळेदरम्यान जिल्ह्यातील उपस्थित सर्व शासकीय अधिकारी आणि कर्मचाऱ्यांनी अंधश्रद्धा निर्मूलनाबाबत सामूहिक शपथ घेतली. कार्यक्रमाच्या शेवटी, समाज कल्याण विभागाचे सहाय्यक आयुक्त सुंदरसिंग वसावे यांनी उपस्थितांचे आभार मानले आणि कार्यशाळा संपन्न झाल्याचे घोषित केले.