*नव्या कामगार संहिता नियमांची प्रसिद्धी,45 दिवसांत सूचना व हरकती नोंदविण्याचे आवाहन*
नंदुरबार(प्रतिनिधी):-नव्या कामगार संहितेअन्वये महाराष्ट्र शासनाने राज्यात अंमलबजावणी करण्यासाठी विविध नियमांची निर्मिती केली असून, हे नियम महाराष्ट्र शासनाच्या राजपत्रात प्रकाशित करण्यात आले आहेत. या नवीन कामगार संहिता नियमांवर नागरिकांना, कामगारांना आणि संबंधित घटकांना आपल्या सूचना व हरकती अधिकृतपणे मांडण्यासाठी शासनाने 45 दिवसांचा विहित कालावधी दिला आहे, असे आवाहन सरकारी कामगार अधिकारी धुळे श्रीमती मधुरा सूर्यवंशी यांनी एका शासकीय प्रसिद्धी पत्रकाद्वारे केले आहे. महाराष्ट्र शासनाने नवीन कामगार संहितेच्या अंतर्गत ‘महाराष्ट्र वेतन संहिता नियम’ आणि ‘महाराष्ट्र औद्योगिक संबंध संहिता नियम’ 28 एप्रिल 2026 रोजी राजपत्रात प्रसिद्ध केले आहेत. तसेच, ‘महाराष्ट्र व्यावसायिक सुरक्षा, आरोग्य व कामाची स्थिती (कामगार) नियम’ आणि ‘सामाजिक सुरक्षा संहिता नियम’ 5 मे 2026 रोजी राजपत्रात प्रकाशित करण्यात आले आहेत. सर्व संबंधित घटकांना या नियमांचे अवलोकन करता यावे, यासाठी या सर्व नियमांच्या प्रती “सरकारी कामगार अधिकारी यांचे कार्यालय, प्लॉट नं. 231, तळमजला, मीरा हॉस्पिटलजवळ, स्टेशन रोड, धुळे- 424001” येथे नागरिकांसाठी उपलब्ध करून देण्यात आल्या आहेत. याशिवाय, सदर अधिसुचना महाराष्ट्र शासनाच्या कामगार विभागाच्या अधिकृत संकेतस्थळावर म्हणजेच https://mahakamgar.maharashtra.gov.in वर देखील माहिती व अवलोकनासाठी उपलब्ध करून देण्यात आली आहे.
या नियमांच्या संदर्भात नागरिकांच्या काही सूचना किंवा हरकती असल्यास, त्यांनी ही बातमी प्रसिद्ध झाल्याच्या दिनांकापासून 45 दिवसांच्या आत कामगार कार्यालय, कामगार भवन, सी- 20, ई-ब्लॉक, वांद्रे- कुर्ला संकुल(BKC),  वांद्रे (पूर्व), मुंबई- 400051 या पत्त्यावर किंवा ई-मेल mh.labourcodes@gmail.com या ईमेल पत्त्यावर पाठविण्यात यावे.
विहित मुदतीनंतर प्राप्त होणाऱ्या सूचना व हरकतींचा विचार केला जाणार नाही. त्यामुळे जिल्ह्यातील सर्व संबंधित आस्थापना, कामगार संघटना आणि कामगारांनी या नियमांचे अवलोकन करून आपल्या महत्त्वपूर्ण सूचना वेळेत नोंदवाव्यात, असेही सरकारी कामगार अधिकारी श्रीमती सूर्यवंशी यांनी शासकीय प्रसिद्धी पत्रकान्वये कळविले आहे.