*रघुवंशी नर्सिंग कॉलेज,नंदुरबार येथे समर इंटर्नशिप प्रोग्राम–2026 सुरवात*
नंदुरबार(प्रतिनिधी):-नंदुरबार तालुका विधायक समिती संचलित श्रीमती विमलताई बेटसिंग रघुवंशी कॉलेज ऑफ नर्सिंग, नंदुरबार येथे महाराष्ट्र आरोग्य विज्ञान विद्यापीठ (MUHS) समर इंटर्नशिप प्रोग्राम–2026 च्या द्वितीय बॅचचा उद्घाटन व ओरिएंटेशन कार्यक्रम महाविद्यालयाच्या सेमिनार हॉलमध्ये उत्साहात संपन्न झाला. या 15 दिवसीय समर इंटर्नशिप कार्यक्रमात आयुर्वेद, युनानी व होमिओपॅथी, नर्सिंग या विविध शाखांमधील एकूण 12 विद्यार्थ्यांनी सहभाग नोंदविला आहे. कार्यक्रमाची सुरुवात सकाळच्या सत्रात  दीपप्रज्वलनाने करण्यात आली. इंटर्नशिप कार्यक्रमाचे नोडल अधिकारी भूषण  ठोबरे यांनी विद्यार्थ्यांना कार्यक्रमाची सविस्तर माहिती देत दोन आठवड्यांच्या प्रशिक्षणाचा आढावा मांडला. या कार्यक्रमाची प्रमुख उद्दिष्टे आरोग्य शिक्षण, आणि आदिवासी आरोग्य संशोधन ही असून विद्यार्थ्यांना संस्थेच्या पालक रुग्णालय असलेल्या छत्रपती मल्टिस्पेशालिटी हॉस्पिटल येथे प्रत्यक्ष प्रशिक्षण व अनुभव मिळणार असल्याचे त्यांनी सांगितले. तसेच समर इंटर्नशिप कार्यक्रम विद्यार्थ्यांमध्ये समुदाय आरोग्य, आदिवासी आरोग्य विषयक जाणीव, संशोधन कौशल्ये व प्रत्यक्ष आरोग्यसेवेचा अनुभव विकसित करण्यासाठी महत्त्वपूर्ण ठरणार असल्याचे त्यांनी सागितले.
कार्यक्रमाच्या व्हर्टिकल हेड प्रा. योगिनी सपकाळे यांनी विद्यार्थ्यांना दोन आठवड्यांच्या कार्यक्रमाचे वेळापत्रक समजावून सांगितले. या कालावधीत विद्यार्थ्यांना आदिवासी भागातील विविध आरोग्य केंद्रांना शैक्षणिक भेटी देण्यात येणार असून त्या माध्यमातून आदिवासी समाजातील आरोग्यविषयक समस्या, त्यावरील उपचार पद्धती व आरोग्य सेवांची माहिती प्रत्यक्ष अनुभवातून मिळणार आहे.
दुपारच्या सत्रात विद्यार्थ्यांना छत्रपती मल्टिस्पेशालिटी हॉस्पिटलची ओळख करून देण्यात आली. यावेळी क्लिनिकल शिक्षक भूषण वळवी व शंकर वसावे यांनी विद्यार्थ्यांना रुग्णालयातील विविध विभागांची माहिती दिली.
संपूर्ण कार्यक्रमाचे सूत्रसंचालन भूषण वळवी यांनी केले तर आभार प्रदर्शन कु. ममता कोळी यांनी केले. कार्यक्रमाची सांगता राष्ट्रगीताने करण्यात आली.