*नंदुरबार जिल्ह्यात व्यंग-अव्यंग विवाह प्रोत्साहन योजनेअंतर्गत नवदांपत्यांचा गौरव*
नंदूरबार(प्रतिनिधी):-सामाजिक न्याय विभाग व दिव्यांग सक्षमीकरण विभाग यांच्या संयुक्त विद्यमाने दिव्यांग व्यक्तींच्या सामाजिक सक्षमीकरणास चालना देण्यासाठी राबविण्यात येणाऱ्या “व्यंग- अव्यंग विवाह प्रोत्साहन योजना” अंतर्गत नंदुरबार तालुक्यातील ठाणेपाडा येथील नवदांपत्यांना प्रोत्साहन अनुदानाचे वितरण करण्यात आले. या योजनेअंतर्गत पात्र विवाहित जोडप्यांना एकूण रुपये 1.50 लाखांचे अनुदान देण्यात येते. त्यामध्ये रुपये 75 हजारांची रक्कम पोस्ट बचत स्वरूपात तसेच रुपये 75 हजारांची रक्कम थेट बँक खात्यात जमा करण्यात येते. सदर योजनेत व्यंग आणि अवेंग यांनी विवाह केला तर दीड लाख रुपये आणि दोन्हीही पती-पत्नी व्यंग असतील तर अडीच लाख रुपये प्रोत्साहन अनुदान दिले जाते. विवाह झाल्यानंतर एक वर्षाच्या आत दिव्यांग सक्षमीकरण विभाग जिल्हा परिषद येथे अर्ज करावा लागतो. सदर कार्यक्रम प्रसंगी अतिरिक्त मुख्य कार्यकारी अधिकारी चंद्रकांत पवार, प्रकल्प संचालक तसेच उपमुख्य कार्यकारी अधिकारी (सामान्य प्रशासन) गणेशकुमार मोरे यांच्या हस्ते लाभार्थी नवदांपत्यांना धनादेश व प्रमाणपत्र प्रदान करण्यात आले. यावेळी सहाय्यक आयुक्त जिल्हा दिव्यांग सक्षमीकरण विभाग नंदकिशोर सूर्यवंशी
उपस्थित होते, या योजनेमुळे दिव्यांग व्यक्तींना समाजामध्ये समान संधी व सन्मान मिळण्यास मदत होत असल्याचे सांगितले. यावेळी संबंधित विभागाचे अधिकारी, कर्मचारी तसेच ग्रामस्थ उपस्थित होते. सदर उपक्रमामुळे सामाजिक समावेशकता व दिव्यांग सक्षमीकरणाला सकारात्मक बळ मिळत असल्याची भावना व्यक्त करण्यात आली.