*मनसे रेल्वे कामगार सेनेकडून गॅंगमन आणि ट्रॅकमन कर्मचाऱ्यांसाठी टोप्यांचे वाटप*
प्रतिनिधी(प्रतिनिधी):-महाराष्ट्र नवनिर्माण रेल्वे कामगार सेनेच्या मुंबई विभागाच्या वतीने नेरळ, कर्जत, खोपोली आणि बदलापूर विभागातील गॅंगमन व ट्रॅकमन कर्मचाऱ्यांसाठी टोप्यांचे वाटप करण्यात आले. पक्षप्रमुख राज ठाकरे तसेच अध्यक्ष जितेंद्र पाटील यांच्या मार्गदर्शनाखाली हा उपक्रम राबविण्यात आला. या उपक्रमामुळे रेल्वे कर्मचाऱ्यांमध्ये संघटनेप्रती आत्मीयता, विश्वास आणि एकजूट अधिक दृढ करण्याचा प्रयत्न करण्यात आला.
मुंबई विभाग अध्यक्ष प्रथमेश म्हात्रे यांच्या संकल्पनेतून हा उपक्रम साकारण्यात आला. रेल्वे रुळांवर कठीण परिस्थितीत काम करणाऱ्या कर्मचाऱ्यांच्या सुरक्षिततेसह त्यांच्याप्रती कृतज्ञता व्यक्त करण्याच्या उद्देशाने टोप्यांचे वाटप करण्यात आले. यावेळी मुंबई विभाग उपाध्यक्ष रवी मोडक यांनीही सक्रिय सहभाग घेत कामगारांशी संवाद साधला आणि त्यांच्या अडचणी जाणून घेतल्या.
रेल्वे कामगार हे रेल्वे व्यवस्थेचा अत्यंत महत्त्वाचा घटक असून, उन्हाळा, पावसाळा किंवा प्रतिकूल परिस्थितीतही ते सातत्याने सेवा बजावत असतात. अशा कर्मचाऱ्यांच्या पाठीशी संघटना कायम उभी राहील, अशी भावना यावेळी व्यक्त करण्यात आली. तसेच भविष्यातही कामगारांच्या हितासाठी विविध उपक्रम राबविण्यात येतील, असा विश्वास संघटनेच्या पदाधिकाऱ्यांनी व्यक्त केला. या कार्यक्रमावेळी निलेश सावंत, विजय सिंग, विजय पांडे, विश्वनाथ लदगे, केतन धुळे, निलेश पडवळ, संदीप कुशवा आणि काशिनाथ बल्लाळ आदी सहकाऱ्यांची उपस्थिती होती. कार्यक्रमाला कामगारांकडून सकारात्मक प्रतिसाद मिळाला असून संघटनेच्या या उपक्रमाचे स्वागत करण्यात आले.