*नंदुरबार सायबर पोलिस ठाणे यांची कामगिरी,फसवणूक झालेली लाखो रुपयांची रक्कम तक्रारदार यांना परत मिळवून दिली*
नंदुरबार(प्रतिनिधी):-तक्रारदार सचिन हिरालाल महाजन, रा. मु.पो. सोनवद, ता. शहादा, जि. नंदुरबार यांची अज्ञात सायबर गुन्हेगारांकडून ऑनलाईन फसवणूक करण्यात आली होती. सदर प्रकरणात तक्रारदार यांची एकूण 3 लाख 34 हजार 255 रुपये इतकी फसवणूक झाली होती. फसवणूक झाल्याचे निदर्शनास येताच तक्रारदार यांनी तात्काळ राष्ट्रीय सायबर हेल्पलाईन क्रमांक 1930 तसेच सायबर पोलीस ठाणे, नंदुरबार येथे तक्रार नोंदविली.
तक्रारीची गांभीर्याने दखल घेऊन सायबर पोलीस ठाणे, नंदुरबार यांनी तात्काळ तांत्रिक तपास करून संबंधित बँका व वित्तीय संस्थांशी समन्वय साधला. तत्पर व प्रभावी कार्यवाहीमुळे फसवणूक झालेल्या रकमेपैकी रु. 2 लाख 40 हजार 549 रुपये इतकी रक्कम तक्रारदार यांना परत मिळवून देण्यात आली आहे.
सायबर पोलीस ठाणे, नंदुरबार यांच्या जलद कार्यवाहीमुळे तक्रारदार यांना मोठा दिलासा मिळाला असून, वेळेत तक्रार केल्यास फसवणुकीची रक्कम परत मिळण्याची शक्यता अधिक वाढते, हे पुन्हा अधोरेखित झाले आहे. पोलीस अधीक्षक सो. नंदुरबार श्रीमती अश्विनी सानप यांच्या मार्गदर्शनाखाली, अपर पोलीस अधीक्षक सो, अशित कांबळे, नंदुरबार यांच्या सूचनेनुसार पोलीस निरीक्षक अमोल सातोदकर सायबर पोलीस स्टेशन, नंदुरबार यांच्या नेतृत्वाखाली सदरची कार्यवाही करण्यात आली.
सदर कार्यवाहीमध्ये पोलीस निरीक्षक अमोल सातोदकर, पोलीस हेड कॉन्स्टेबल चंद्रशेखर बडगुजर, यांनी विशेष प्रयत्न केले.
नागरिकांना आवाहन कोणत्याही अनोळखी लिंकवर क्लिक करू नये, OTP/CVV / बँकिंग माहिती कोणासही शेअर करू नये, स्क्रीन शेअरिंग अॅप डाउनलोड करू नये. सोशल मीडियावरील आकर्षक ऑफर व बनावट कॉलपासून सावध राहावे, आपल्या मोबाईलवर आलेली APK File यावर क्लिक अथवा डाऊनलोड करु नये तसेच सदरची APK File कोणासही पुढे फॉरवर्ड करु नये. तसेच Digital Arrest संदर्भात आलेले कॉल्स यांना घाबरुन न जाता पोलीसांशी तात्काळ संपर्क साधावा असे आवाहन सायबर पोलीस स्टेशनतर्फे करण्यात येत आहे.
ऑनलाईन फसवणूक झाल्यास विलंब न करता तात्काळ NCCRP पोर्टल www. cybercrime.gov.in किंवा 1930 हेल्पलाईन वर तक्रार नोंदवावी. नागरिकांच्या जनजागृतीमुळे व त्वरित तक्रारीमुळे सायबर गुन्ह्यांवर प्रभावी नियंत्रण मिळविणे शक्य होणार आहे.