*बारसू-धोपेश्वरच्या मातीतील अनमोल रत्ने देवेंद्र आणि प्रथमेश कदम बंधू राजापूर टेनिस क्रिकेटचे अभिमान*
धोपेश्वर(प्रतिनिधी):-राजापूर टेनिस क्रिकेटचा 'जय- वीरू' पॅटर्न देवेंद्र आणि प्रथमेश कदम! बारसू- धोपेश्वरच्या मातीतून उमललेली क्रिकेटची दोन अनमोल रत्ने! राजापूर तालुक्यात टेनिस क्रिकेटचा विषय निघाला आणि 'कदम बंधू' यांचे नाव आले नाही, असे कधी होणारच नाही. बारसू-धोपेश्वर गावचे हे दोन सख्खे भाऊ आज संपूर्ण राजापूर आणि कोकणच्या टेनिस क्रिकेट विश्वात आपल्या अष्टपैलू खेळाने आणि अफाट कौशल्याने एक वेगळी ओळख निर्माण करुन आहेत.  ‌लहानपणापासूनच मनात क्रिकेटचे वेड जपणाऱ्या या दोघांनी आज कठोर परिश्रम आणि जिद्दीच्या जोरावर यशाचे एक नवे शिखर गाठले आहे.
मोठे बंधू  देवेंद्र कदम (द वॉल आणि अष्टपैलू खेळाडू)‌ गावाच्या संघातून खेळायला सुरुवात केल्यानंतर देवेंद्र कदम यांनी आपल्या खेळाचा आलेख नेहमीच उंचावत ठेवला. एक 'लेफ्टी फलंदाज' म्हणून त्यांची स्टायलिश फलंदाजी पाहणे प्रेक्षकांसाठी नक्कीच डोळ्यांचे पारणे फेडणारे असते. मैदानाच्या चारी बाजूंना फटकेबाजी करण्याची त्यांची शैली अफाट आहे. फलंदाजीसोबतच त्यांची अचूक आणि भेदक गोलंदाजी विरोधी संघाच्या चांगल्या - चांगल्या फलंदाजांना शांत ठेवते. आपल्या अचूक टप्प्यावरील गोलंदाजीने त्यांनी अनेकदा सामन्याचा नूर पालटवला आहे.
त्याचे छोटे बंधू प्रथमेश कदम (उगवता तारा आणि धडाकेबाज फलंदाज) मोठे भाऊ देवेंद्र यांच्या पावलावर पाऊल ठेवत प्रथमेश यांनी क्रिकेटच्या मैदानावर पाऊल ठेवले. भावाचा आदर्श डोळ्यांसमोर ठेवून प्रथमेश यांनी स्वतःचा खेळ इतका विकसित केला आहे की, आज ते एक उत्कृष्ट आणि स्फोटक फलंदाज म्हणून नावारूपास आले आहेत. कठीण प्रसंगात संयम राखून आणि गरज पडेल तेव्हा आक्रमक फलंदाजी करून संघाला विजय मिळवून देण्याची ताकद प्रथमेश यांच्यात आहे. या दोन्ही बंधूंची ताकद जेव्हा मैदानावर एकत्र येते, तेव्हा विरोधी संघाची रणनीती अपयशी ठरते. दोघांनी मिळून आपल्या बारसू -धोपेश्वर गावच्या संघाला कित्येक मानाच्या स्पर्धा 'एकहाती' जिंकून दिल्या आहेत. त्यांच्या या उत्कृष्ट कामगिरीची दखल केवळ राजापूर पुरती मर्यादित राहिलेली नाही.
मुंबईतील अत्यंत प्रतिष्ठेची आणि नामांकित समजली जाणारी 'सुप्रिमो'  (Supremo) सारख्या भव्य टेनिस क्रिकेट स्पर्धेतही या दोन बंधूंनी आपल्या कौशल्याचा ठसा उमटवला आहे. एवढ्या मोठ्या मंचावर जाऊन खेळणे आणि गावाचे नाव संपूर्ण महाराष्ट्रात अभिमानाने उंचावणे ही अत्यंत कौतुकास्पद बाब आहे. "मैदानावर धावपट्टीच्या दोन टोकांवर जेव्हा हे दोन भाऊ उभे असतात, तेव्हा ते फक्त धावा काढत नसतात, तर बारसू-धोपेश्वर गावच्या स्वाभिमानाची आणि यशाची नवी कहाणी लिहीत असतात. राजापूर टेनिस क्रिकेटचै अभिमान असलेले ‌ ‌‌देवेंद्र कदम आणि प्रथमेश कदम या जोडगोळीचा खेळ असाच बहरत राहो  पुढील क्रिकेट प्रवासासाठी आणि भावी वाटचालीसाठी
तालुक्यातील टेनिस क्रिकेट प्रेमी व प्रेक्षकांनी दोघा बंधूना मनापासून  शुभेच्छा दिल्या आहेत.