*नंदुरबार येथे विशेष अस्थिमज्जा जुळवणी तपासणी शिबिर, 12 मे रोजी मोफत तपासणी व तज्ज्ञांचे मार्गदर्शन-डॉ.विनय सोनावणे*
नंदुरबार(प्रतिनिधी):-महाराष्ट्र शासनाच्या सार्वजनिक आरोग्य विभागामार्फत “एक पाऊल थॅलेसेमिया मुक्तीकडे” संकल्प सप्ताहानिमित्त राज्यभर थॅलेसेमिया मुक्त महाराष्ट्र अभियान राबविण्यात येत आहे. या अभियानांतर्गत नंदुरबार जिल्हा रुग्णालय यांच्या वतीने महिला रुग्णालयाच्या बाल विकास व उपचार विभागात विशेष अस्थिमज्जा जुळवणी तपासणी शिबिराचे आयोजन करण्यात आल्याची माहिती जिल्हा शल्य चिकित्सक डॉ. विनय सोनावणे यांनी दिली आहे. हे शिबिर मंगळवार, दिनांक 12 मे 2026 रोजी सकाळी 10 वाजता महिला रुग्णालय (नंदुरबार) येथील पहिल्या मजल्यावरील बाल विकास व उपचार विभागात होणार आहे. या शिबिरात 15 वर्षांखालील थॅलेसेमिया मेजर, सिकलसेल आणि अस्थिमज्जा निकामी होण्याच्या आजाराने बाधित बालकांची विशेष तपासणी करण्यात येणार आहे. तसेच अस्थिमज्जा प्रत्यारोपण शस्त्रक्रियेबाबत तज्ज्ञ डॉक्टरांकडून मार्गदर्शन करण्यात येणार आहे. या उपक्रमासाठी डीकेएमएस इंडिया, थॅलेसेमिया पालक संघटना आणि अवंता फाउंडेशन, चहार्डी यांचे सहकार्य लाभले असून कोकिलाबेन धीरूभाई अंबानी रुग्णालय, मुंबई यांच्या माध्यमातून तपासणी व वैद्यकीय मार्गदर्शन उपलब्ध करून दिले जाणार आहेत. शिबिरातील सर्व तपासण्या मोफत करण्यात येणार असून तपासणी अहवालही संबंधित संस्थांकडून विनामूल्य दिले जाणार आहेत.
तपासणीनंतर ज्या रुग्णांची अस्थिमज्जा जुळवणी पूर्णपणे योग्य आढळेल, त्या बालकांसाठी अस्थिमज्जा प्रत्यारोपण शस्त्रक्रियेसाठीही मोफत सहाय्य करण्यात येणार आहे. या माध्यमातून गंभीर रक्तविकाराने बाधित बालकांना योग्य उपचाराची संधी उपलब्ध होणार आहे.
सिकलसेल आणि थॅलेसेमिया हे आनुवंशिक आजार असून वेळेवर तपासणी व उपचार केल्यास भविष्यातील गंभीर धोके टाळता येऊ शकतात. त्यामुळे संबंधित बालकांचे पालक, नातेवाईक व नागरिकांनी या शिबिरात सहभागी होऊन तपासणी करून घ्यावी. नाव नोंदणीसाठी जिल्हा रुग्णालयातील सिकलसेल विभाग, महिला रुग्णालयातील बाल विकास व उपचार विभाग तसेच राष्ट्रीय बाल स्वास्थ्य कार्यक्रमाचे जिल्हा पर्यवेक्षक श्री. मनोहर ढिवरे यांच्याशी संपर्क साधावा व थॅलेसेमिया मुक्त महाराष्ट्र अभियानाला सहकार्य करावे, असे आवाहनही जिल्हा शल्य चिकित्सक डॉ. विनय सोनावणे यांनी केले आहे.