*नंदुरबार येथे जैन अल्पसंख्यक समितीच्या वतीने विविध उपक्रमांचे भव्य आयोजन*
नंदुरबार(प्रतिनिधी):-सकल जैन समाजांतर्गत जैन अल्पसंख्यक समितीच्या वतीने विविध सामाजिक, विकासाभिमुख व प्रेरणादायी कार्यक्रमांचे भव्य आयोजन उत्साहपूर्ण वातावरणात संपन्न झाले. कार्यक्रमाच्या प्रारंभी सेवा भवनाचे उद्घाटन अखिल भारतीय जैन अल्पसंख्यक महासंघ व जैन विकास आर्थिक महामंडळाचे राष्ट्रीय अध्यक्ष ललित गांधी यांच्या शुभहस्ते करण्यात आले. यावेळी अल्पसंख्यक समितीच्या 16 सदस्यीय कार्यकारिणीची नियुक्ती जाहीर करण्यात आली.
त्यानंतर अल्पसंख्यक निधीतून एम.एल. टाऊन परिसरातील रस्त्याच्या कामाचे भूमिपूजन राष्ट्रीय अध्यक्ष ललित गांधी, आ. चंद्रकांत रघुवंशी, नगराध्यक्षा सौ. रत्ना रघुवंशी यांच्या करकमलांनी संपन्न झाले.
यानंतर छत्रपती शिवाजी नाट्यमंदिरात सकल जैन संघाच्या वतीने राष्ट्रीय अध्यक्ष ललित गांधी यांचे भव्य स्वागत करण्यात आले. कार्यक्रमाची सुरुवात स्थानकवासी महिलामंडळ व नवकार ग्रुप यांच्या मंगलाचरण व स्वागतगीताने मंगलमय वातावरणात झाली.
कार्यक्रमाची प्रस्तावना  पीनल शहा यांनी केली, तर अतिथी परिचय  देवेंद्र जैन यांनी करून दिला. आपल्या प्रेरणादायी मार्गदर्शनात ललित गांधी यांनी जैन विकास आर्थिक महामंडळामार्फत जैन समाजासाठी राबविण्यात येत असलेल्या विविध योजनांची सविस्तर माहिती उपस्थितांना दिली. यावेळी जैन समाजात संस्कार संवर्धनाचे कार्य करणाऱ्या पाठशाळांचा विशेष सत्कार ललित गांधी यांच्या हस्ते करण्यात आला. यावेळी नगरसेवक उमेश जैन, बाजार समितीचे संचालक गिरीश जैन यांच्यासह विविध मान्यवर उपस्थित होते कार्यक्रमाचे  सूत्रसंचालन गायक  विजय अजमेरा व जयति शहा यांनी केले, तर आभार प्रदर्शन  सुरेश जैन यांनी मानले. कार्यक्रमाच्या यशस्वी आयोजनासाठी  पीनल शहा, विरल कुँवाडिया, देवेंद्र जैन, कमलेश कांगटानी, जयेश बाफना, सुरेश जैन आदींनी विशेष परिश्रम घेतले. या भव्य आणि प्रेरणादायी आयोजनास सकल जैन समाजाचा उत्स्फूर्त व मोठ्या संख्येने सहभाग लाभला, ही विशेष उल्लेखनीय बाब ठरली.