*नंदुरबार जिल्ह्यातील कार्यकर्त्यांकडून डॉ. अभिजित मोरे यांना राष्ट्रवादी काँग्रेस पक्षाकडून विधान परिषदेवर संधी देण्याची मागणी*”
नंदूरबार(प्रतिनिधी):-नंदुरबार जिल्ह्यातील राष्ट्रवादी काँग्रेस पक्षाचे प्रमुख नेते भरत मानिकराव गावीत, रतन पाडवी, नरेंद्र नगराळे, सौ. प्रतिभा शिंदे, वतन अग्रवाल तसेच अनेक कार्यकर्त्यांनी मुंबई येथे जाऊन राष्ट्रवादी काँग्रेस पक्षाचे सरचिटणीस शिवाजीराव गरजे यांची भेट घेतली. या भेटीत नंदुरबार जिल्ह्यातून विधान परिषदेवर स्थानिक कार्यकर्त्याला संधी द्यावी, अशी ठाम मागणी करण्यात आली. डॉ. अभिजित दिलीप मोरे यांचे पक्षासाठी असलेले मोठे योगदान लक्षात घेऊन त्यांना विधान परिषदेची उमेदवारी देण्यात यावी, अशी मागणी कार्यकर्त्यांनी मांडली. नंदुरबार जिल्ह्यातील सर्वच विधानसभा मतदारसंघ आदिवासी संवर्गासाठी राखीव असल्यामुळे डॉ. मोरे यांना निवडणूक लढविण्याची संधी मर्यादित राहते. तरीही मोरे कुटुंबाचे राष्ट्रवादी काँग्रेस पक्षासाठी मोठे योगदान राहिले आहे. डॉ. अभिजित मोरे यांनी जिल्हाध्यक्षपदाची जबाबदारी स्वीकारल्यानंतर पक्षाने नंदुरबार जिल्ह्यात लक्षणीय वाढ साधली असून, चारपैकी दोन नगरपालिका जिंकण्याचा करिश्मा त्यांनी करून दाखवला आहे. या सर्व पार्श्वभूमीवर डॉ. अभिजित मोरे यांना विधान परिषदेचे तिकीट देऊन संधी उपलब्ध करून द्यावी, अशी मागणी कार्यकर्त्यांनी ठामपणे मांडली. यावर शिवाजीराव गरजे यांनी सकारात्मक प्रतिसाद दिला.