*नंदुरबार नगरपालिकेचे मुख्याधिकारी लोकप्रतिनिधी नगरसेवक व नागरिकांच्या समस्यांकडे जाणीवपूर्वक दुर्लक्ष करत असल्याबाबत, तक्रार व कारवाईच्या मागणीचे जिल्हाधिकाऱ्यांना निवेदन*
नंदुरबार(प्रतिनिधी):-सौ. सुषमा धर्मेंद्र गावीत, नगरसेविका, नंदुरबार नगरपरिषद, नंदुरबार यांनी जिल्हाधिकारी, नंदुरबार यांना नंदुरबार नगरपालिकेचे मुख्याधिकारी लोकप्रतिनिधी नगरसेवक व नागरिकांच्या समस्यांकडे जाणीवपूर्वक दुर्लक्ष करत असल्याबाबत तक्रार व कारवाईची मागणीचे निवेदन दिले आहे. नगरसेविका म्हणून प्रभाग क्र. 17 मधून निवडून आलेल्या सौ. सुषमा धर्मेंद्र  गावीत यांनी ड्रेनेज, रस्ता दुरुस्ती, पाणीपुरवठा या समस्यांबाबत मुख्याधिकाऱ्यांना वारंवार लेखी पत्र दिले. परंतु आजपर्यंत मुख्याधिकाऱ्यांनी कोणतीही कार्यवाही केली नाही किंवा लेखी उत्तरही दिलेले नाही. सर्वसाधारण सभेत मंजूर झालेल्या ठरावांची अंमलबजावणी देखील केली जात नाही. त्यामुळे नागरिकांना त्रास सहन करावा लागत आहे व नगरसेवकांच्या प्रतिष्ठेला धक्का पोहोचत आहे. महाराष्ट्र नगरपरिषद अधिनियम 1965 नुसार हे वर्तन प्रशासकीय कर्तव्यात कसूर करणारे आहे. जिल्हाधिकाऱ्यांनी स्वतः लक्ष घालून चौकशी करावी व संबंधित मुख्याधिकाऱ्यांना नगरसेवकांनी मांडलेल्या जनहिताच्या कामांना प्राधान्य देऊन वेळेत कार्यवाही करण्याचे आदेश द्यावेत. अशी मागणी निवेदनाव्दारे केली आहे.