*समाजमाध्यमांवर चुकीच्या / खोट्या बातम्या पसरविल्यास कायदेशीर कारवाई, नंदुरबार जिल्हा पोलीसांचा ईशारा*
नंदुरबार(प्रतिनिधी):-मागील काही दिवसांपासून नंदुरबार पोलीस दलातील वरिष्ठ पोलीस अधिकारी यांच्याविरुध्द् व नंदुरबार पोलीसांनी केलेल्या कारवायांबाबत अपुऱ्या किंवा चुकीच्या माहितीवरून काही प्रसारमाध्यमांनी तसेच जबाबदार संघटनांनी समाजमाध्यमांवर चुकीच्या / खोट्या बातम्या पसरवून गैरसमज निर्माण करुन वरिष्ठ पोलीस अधिकारी व नंदुरबार पोलिसांबाबत चुकीची माहीती प्रसारीत केली जात आहे. तसेच काही युट्यूब चॅनेल, जबाबदार संघटना यांनी याबाबत चुकीच्या माहितीच्या आधारे दिशाभूल करणारे वक्तव्य करुन बातम्या / व्हिडीओ प्रसारीत केले आहेत. पोलीसांनी कोणताही गैर वाजवी हेतू न ठेवता जिल्ह्यात शांतता राहावी म्हणून कायदेशीर कारवाया केलेल्या आहेत, परंतु माहितीची शहानिशा न करता समाजमाध्यमांवर खोट्या माहितीचे AI GENERATED VIDEO तयार करुन काही समाजकंटकांनी प्रसारित केली आहेत. त्यातून समाजमाध्यमांद्वारे पोलीसांची प्रतिमा मलीन करुन जनतेमध्ये पोलीसांबद्दल असंतोष व रोष निर्माण करण्याचा प्रयत्न करीत आहेत. त्यामुळे जनतेत विशेषतः युवकांमध्ये चुकीचा संदेश जाण्याची शक्यता नाकारता येत नाही. त्यामुळे सर्व प्रिंट व इलेक्ट्रॉनिक मिडीया तसेच युट्यूब चॅनेल तसेच सर्व नागरिकांना आवाहन करण्यात येते की, आपणास मिळालेल्या कुठल्याही माहितीची इकडील कार्यालयाकडून किंवा जवळच्या पोलीस ठाण्याकडून खात्री /शहानिशा करूनच बातमी / व्हिडीओ / सोशल मीडिया पोस्ट प्रसारित करावेत. तसेच या आवाहनानंतर कोणीही खोट्या बातम्या प्रसारित करु नये. तसेच ज्यांनी समाज माध्यमांद्वारे सदर खोटी बातमी प्रसारित करण्यात आली आहे, त्या व्यक्तींनी या आवाहनानंतर सदर खोटी बातमी / व्हिडीओ / सोशल मीडिया पोस्ट काढून टाकावेत, अशी सूचना करण्यात येत आहे, अन्यथा त्यांच्याविरुध्द प्रचलीत कायद्यान्वये कडक कारवाई करण्यात येईल. तसेच चुकीच्या माहितीच्या आधारे तयार केलेल्या केलेल्या कोणत्याही समाज माध्यमांवरील बातमी अगर व्हिडीओमुळे भविष्यात अनुचीत घटना घडल्यास चुकीच्या माहिती प्रसारीत करणाऱ्या इसमांस संभाव्य घटनेबाबत जबाबदार धरण्यात येईल यांची सर्वांनी नोंद घ्यावी. तरी सर्व संबंधीतांना पुन्हा आवाहन करण्यात येते की, समाजमाध्यमांवर नंदुरबार पोलीसांबाबत अपुर्या किंवा चुकीच्या माहितीच्या आधारे समाजमाध्यमांवर चुकीच्या किंवा खोट्या बातम्या पसरविल्यास अशा इसमांविरुध्द प्रचलीत कायद्यान्वये कडक कारवाई करण्यात येईल, याची नोंद घ्यावी.