*आ.चंद्रकांत रघुवंशींच्या पाठपुराव्याला महसूल मंत्र्यांचा प्रतिसाद, उमापती महादेव मंदिर, नवीन पं.स इमारतीसाठी जागा मिळणार*
नंदुरबार(प्रतिनिधी):-शहराचे वैभव असलेल्या 100 वर्षांपूर्वीच्या प्राचीन उमापती महादेव मंदिर परिसरातील साडेचार एकर शासकीय जागेवरील अतिक्रमण नियमित करणे आणि जुन्या तहसीलदार कार्यालयाची 50 टक्के जागा नियोजित नवीन पंचायत समिती इमारतीसाठी उपलब्ध करून देणे, या दोन्ही महत्त्वपूर्ण मागण्या शिवसेना संपर्कप्रमुख आ. चंद्रकांत रघुवंशी यांनी राज्याचे महसूल मंत्री चंद्रशेखर बावनकुळे यांच्याकडे आग्रही केली. यावर ना. बावनकुळे यांनी सकारात्मक प्रतिसाद दिला आहे. मुंबई येथे महसूल मंत्र्यांच्या दालनात यासंदर्भात बैठकीचे आयोजन करण्यात आले होते. यावेळी आ. चंद्रकांत रघुवंशी यांनी उमापती महादेव मंदिराचे धार्मिक आणि ऐतिहासिक महत्त्व विषद केले. "हे मंदिर शेकडो वर्षांपासून नंदुरबारकरांचे श्रद्धास्थान आहे. श्रावण मास आणि दसऱ्याच्या सीमोल्लंघनासाठी येथे मोठी गर्दी असते. त्यामुळे मंदिराच्या ताब्यातील 4.5 एकर शासकीय जागा मंदिराच्या नावे नियमित करणे आवश्यक आहे," असे त्यांनी बैठकीत पटवून दिले. तसेच, शहरातील प्रशासकीय सोयीसाठी जुन्या तहसील कार्यालयाची 50 टक्के जागा नियोजित पंचायत समितीच्या नवीन इमारतीसाठी देण्याची मागणीही त्यांनी लावून धरली. या दोन्ही विषयांवर महसूल मंत्री चंद्रशेखर बावनकुळे यांनी संबंधित विभागाच्या अधिकाऱ्यांशी चर्चा करून सकारात्मक निर्णय घेण्याचे आश्वासन दिले आहे. या निर्णयामुळे मंदिराच्या विकासाचा मार्ग मोकळा होणार असून पंचायत समितीलाही हक्काची जागा मिळणार आहे. या बैठकीला महसूल विभागाचे वरिष्ठ अधिकारी उपस्थित होते.