*जामिया विधी महाविद्यालय व जामिया अभियांत्रिकी महाविद्यालयाच्या संयुक्त विद्यमाने आंतरराष्ट्रीय महिला दिन साजरा*
अक्कलकुवा(प्रतिनिधी):-अक्कलकुवा येथील जामिया विधी महाविद्यालय व जामिया अभियांत्रिकी महाविद्यालयाच्या संयुक्त विद्यमाने  विधी महाविद्यालयाच्या सेमिनार हॉलमध्ये आंतरराष्ट्रीय महिला दिन साजरा करण्यात आला. या कार्यक्रमात महिलांचे अधिकार, सुरक्षितता आणि सक्षमीकरण यावर विशेष भर देण्यात आला. जामिया इन्स्टिट्यूट ऑफ टेक्नॉलॉजीचे प्राचार्य डॉ. सैयद कमालुद्दीन यांनी महिलांच्या सुरक्षितता व संरक्षण या विषयावर मार्गदर्शन केले. त्यांनी सांगितले की आंतरराष्ट्रीय महिला दिन समाजाला महिलांसाठी समानता, सन्मान आणि संरक्षण सुनिश्चित करण्याची आठवण करून देतो. कार्यक्रमादरम्यान आंतरराष्ट्रीय महिला दिन 2026 च्या “Give to Gain” या थीमचा उल्लेख करण्यात आला. या थीमनुसार, महिलांना समान संधी, शिक्षण आणि संसाधने उपलब्ध करून दिल्यास समाजाचा सर्वांगीण विकास आणि आर्थिक प्रगती साध्य होऊ शकते.
प्रा. फहाद अली खान यांनी महिलांच्या संरक्षणासाठी असलेल्या विविध राष्ट्रीय आणि आंतरराष्ट्रीय कायद्यांच्या विधी चौकटी बाबत माहिती दिली.
यावेळी जामिया इन्स्टिट्यूट ऑफ टेक्नॉलॉजीचे अक्कलकुवा येथील वरिष्ठ ग्रंथपाल डॉ. सैयद अघा नूर आणि प्राध्यापक उपस्थित होते. महिला कर्मचारी व विद्यार्थिनींनी सक्रिय सहभाग घेतला, तर काही विद्यार्थिनींनी महिला सक्षमीकरण आणि समान हक्कांबाबत आपले विचार मांडले. आभार जामिया विधी महाविद्यालयाचे प्राचार्य डॉ. सऊद अहमद यांनी मानले. त्यांनी भारतातील महिलांच्या संरक्षणासाठी असलेल्या विविध कायद्यांचे महत्त्व स्पष्ट केले आणि जामिया संस्थांनी स्थापनेपासून आजपर्यंत विद्यार्थिनी व कर्मचाऱ्यांच्या सुरक्षिततेसाठी नेहमीच कटिबद्ध राहिले असून भविष्यातही ही बांधिलकी कायम राहील, असे आश्वासन दिले.