*शिवगिरी महाराज यांच्या पुण्यतिथीनिमित्त महाआरती व महाप्रसादाचे आयोजन*
नंदुरबार(प्रतिनिधी):-शिवगिरी महाराज यांच्या पुण्यतिथी निमित्त डुबकेश्वर महादेव मंदिर येथे भक्तिमय वातावरणात विविध धार्मिक कार्यक्रमांचे आयोजन करण्यात आले. यानिमित्त महाआरती व महाप्रसादाचे आयोजन करण्यात आले होते यावेळी भाविकांनी मोठ्या संख्येने उपस्थित राहून दर्शनाचा लाभ घेतला.
सकाळपासूनच मंदिर परिसरात भक्तांची गर्दी उसळली होती. मंदिर आकर्षक फुलांच्या सजावटीने व विद्युत रोषणाईने सजविण्यात आले होते. वेदघोष, भजन-कीर्तन आणि हरिनाम संकीर्तनाने परिसर दुमदुमून गेला होता. यावेळी श्री श्री 1008 महामंडलेश्वर सतीगिरीजी महाराज (माताजी) व साधुसंतांचा हस्ते शिवगिरी महाराजांच्या प्रतिमेला पुष्पहार अर्पण करून अभिवादन करण्यात आले व दुपारी 12 वाजता सामूहिक महाआरती करण्यात येऊन
कार्यक्रमानंतर महाप्रसादाचे वाटप करण्यात आले. हजारो भाविकांनी दर्शनाचा व महाप्रसादाचा लाभ घेतला. शिवगिरी महाराज यांनी अनेक वर्षे डुबकेश्वर महादेव मंदिरात सेवा केली आहे त्याचा आशिर्वाद भक्तांवर नेहमी असतो.19 वर्षांपासून शिवगिरी महाराजांची जयंती येथे उत्साहात साजरा करण्यात येत आहे. यासाठी सर्व भक्तगण मेहनत घेतात. यासह शिवगिरी महाराज यांचा कार्याचा गौरव करत त्यांच्या सामाजिक व आध्यात्मिक विचारांचे अनुसरण करण्याचे आवाहन करण्यात आले. भविष्यात शिवगिरी महाराज यांच्या आशिर्वादाने मंदिर परिसरात भव्य गोशाळा व वृद्धाश्रमची निर्मिती करण्यात येणार असल्याचे श्री श्री 1008 महामंडलेश्वर सतीगिरीजी महाराज (माताजी) यांनी बोलतांना सांगितले. शिवगिरी महाराज याचा समाजात एकोपा, सद्भावना आणि सेवा वृत्ती रुजविण्याचा संदेश देत कार्यक्रमाची सांगता करण्यात आली. कार्यक्रम यशस्वी करण्यासाठी देवानंद पाटील, जयेश काकडे, शंकर पाडवी, गोपाल पाटील, आनंद मराठे, ईश्वर मराठे यांच्यासह आयोजन समितीने विशेष परिश्रम घेतले.