*राजापूरातील मूर गावात बिबट्याच्या हल्ल्यात प्रौढ गंभीर, ग्रामस्थ भयभीत*
राजापूर(प्रतिनिधी):-तालुक्यातील मूर या गावी रवींद्र भांबाडे यांच्यावर बिबट्याने हल्ला करुन त्यांना गंभीर जखमी केले आहे. या घटनेने मूर, वाळवड, काजिर्डा, कोळंब, तळवडे परिसरात प्रचंड भीतीचे वातावरण पसरले आहे. याबाबत अधिक वृत्त असे की रवींद्र भांबाडे हे कोळंब तिठा येथे असलेल्या घरांमध्ये एकटेच वास्तव्यास असतात तर त्यांची पत्नी व मुले ही मुंबईत वास्तव्यास असतात. रवींद्र भांबाडे यांनी स्वतःच्या रक्षणासाठी दोन कुत्रे पाळले आहेत. त्यांच्या घराजवळ जंगलमय‌ रान, झाडी असल्याने बिबट्याचा नेहमीच या परिसरात मुक्त संचार सुरु असतो. त्यातच रवींद्र भांबाडे यांनी पाळलेल्या कुत्र्याच्या वासाने त्याचा मागोवा घेत बिबट्या रात्री 12.30 वा. सुमारास आला. या सुमारास कुत्रा भुंकू लागला म्हणून रवींद्र भांबाडे हे आपले घराचे दार उघडून बाहेर पहावयास आले या दरम्यान बिबट्याने थेट घरामध्ये घुसून कुत्र्यावर झडप घातली. बिबटया चक्क घरात घुसला हे पाहून भांबाडे यांना काहीच सुचेनासे झाले शेवटी कुत्र्याला वाचवणे गरजेचे होते. म्हणून घरातील मिळेल ती वस्तू घेऊन बिबट्यावर हल्ला करण्यास सुरुवात केली. त्यामुळे बिबट्याने कुत्र्याला सोडले व भांबाडे  यांच्यावर हल्ला केला. या घटनेची माहिती आजुबाजूच्या शेजारच्या लोकांना मिळताच त्यांनी आरडाओरडा केला. त्यामुळे बिबट्या भांबाडे यांना सोडून बाजूच्या जंगलात पसार झाला. या हल्ल्यात भांबाडे गंभीर जखमी झाले असून त्यांना उपचारासाठी ग्रामीण रुग्णालय रायपाटण येथे दाखल करण्यात आले आहे. या घटनेने मूर परिसरातील गावांमध्ये प्रचंड प्रमाणात भीतीचे वातावरण पसरले आहे.