*बडोदा येथे प.पू. महंत स्वामी महाराजांचा 92 वा जन्मजयंती महोत्सव भव्य व दिव्य वातावरणात साजरा*
नंदूरबार(प्रतिनिधी):-बडोदा येथे दिनांक 2 फेब्रुवारी 2026 रोजी प.पू. महंत स्वामी महाराजांचा 92 वा जन्मजयंती महोत्सव अत्यंत श्रद्धा, भक्ती आणि गौरवपूर्ण वातावरणात साजरा करण्यात आला. या ऐतिहासिक सोहळ्याला गुजरातचे मुख्यमंत्री  भूपेंद्र पटेल व मध्य प्रदेशचे मुख्यमंत्री मोहन यादव हे प्रमुख अतिथी म्हणून उपस्थित होते. या प्रसंगी ‘हिंदू ग्रंथाचे सर्वात मोठे समूहगान’ (Largest Simultaneous Hindu Text Recital) या विक्रमासाठी गिनीज वर्ल्ड रेकॉर्ड्सकडून प.पू. महंत स्वामी महाराजांचा सन्मान करण्यात आला. हा सन्मान भारतीय हिंदू सनातन संस्कृतीचा जागतिक पातळीवरील गौरव ठरला. प.पू. महंत स्वामी महाराजांच्या प्रेरणेने बी.ए.पी. एस. स्वामीनारायण संस्थेच्या 3 ते 13 वयोगटातील 15000हून अधिक बाल-बालिकांनी अवघ्या एका वर्षात 315 श्लोकांचा ‘सत्संगदीक्षा’ ग्रंथ संस्कृतमध्ये मुखपाठ केला व समूहगान सादर केले. यामध्ये खानदेश विभागातून 117 बालक आणि 125 बालिकांनी सत्संगदीक्षा ग्रंथाचे यशस्वी अध्ययन व मुखपाठ करून या ऐतिहासिक विक्रमात सहभाग नोंदवला. यात नंदुरबार येथील श्रेय घनश्याम घोसल्या, मोक्ष भरत पटेल, नमन उमेश विसपुते, घनश्याम हरीश पाटील, अक्षर  घोसल्या, तुषार पटेल, स्वयम सोनार, मनन  बडगुजर आणि  कु.सौम्या संदीप पारेख या बालकांनी देखील 315 संस्कृत श्लोक असलेला संपूर्ण सत्संग दिक्षा ग्रंथ मुखोदगत करून गिनिज बुक ऑफ वर्ल्ड रेकॉर्डमध्ये आपले नाव नोंदवले आहे. आणि नंदुरबार जिल्ह्याला  नावलौकिक मिळवून दिले आहे.
या महोत्सवात आदिवासी भागांसाठी ‘मोबाईल पाठशाळा’चा शुभारंभ, ‘BAPS Kids’ यूट्यूब चॅनेलचे लोकार्पण तसेच ‘Insights from the Satsang Diksha’ या ग्रंथाचे विमोचन करण्यात आले. या कार्यक्रमात उपस्थित सुमारे दोन लाख हरिभक्तांनी केलेल्या समूह आरतीमुळे संपूर्ण परिसर भक्तिरसाने भारावून गेला. या भव्य सोहळ्यात 800 संत व हजारो स्वयंसेवकांनी सेवा दिली. या जन्मजयंती महोत्सवाने हिंदू सनातन धर्माचा गौरव, मूल्याधिष्ठित जीवनशैली व भावी पिढीसाठी संस्कारांची प्रेरणा देणारा ऐतिहासिक संदेश संपूर्ण जगाला दिला.