*IEEDSSA ॲथलेटिक्स स्पर्धेत शताब्दी इन्स्टिट्यूट ऑफ फार्मसीच्या विद्यार्थ्यांचे घवघवीत यश*
नंदूरबार(प्रतिनिधी):-IEEDSSA या पदविका फार्मसी व इंजीनियरिंग विभागाच्या अथलेटिक्स या खेळ प्रकारच्या मॅचेस धुळे येथील जिल्हा क्रीडा संकुल येथे पार पाडल्या SES कॉलेज ऑफ इंजिनियरिंग वाडीभोकर धुळे यांच्या वतीने आयोजित करण्यात आलेल्या राज्यस्तरीय ॲथलेटिक्स स्पर्धेत शताब्दी इन्स्टिट्यूट ऑफ फार्मसी महाविद्यालयाच्या विद्यार्थ्यांनी अत्यंत चमकदार व उल्लेखनीय कामगिरी करत महाविद्यालयाच्या क्रीडा परंपरेत मानाचा तुरा रोवला आहे. विविध स्पर्धांमध्ये विद्यार्थ्यांनी मिळवलेल्या यशामुळे महाविद्यालयाचा नावलौकिक मोठ्या प्रमाणात वाढला आहे. या स्पर्धेत यश ठाकरे याने आपली उत्कृष्ट खेळाडूवृत्ती सिद्ध करत थाळीफेक (Discus Throw) या प्रकारात प्रतिस्पर्ध्यांवर मात करत प्रथम क्रमांक पटकावला. याचबरोबर त्याने भालाफेक (Javelin Throw) या स्पर्धेतही सातत्यपूर्ण कामगिरी करत द्वितीय क्रमांक मिळवला. एका खेळाडूने दोन वेगवेगळ्या खेळांमध्ये मिळवलेले हे यश विशेष कौतुकास्पद ठरले आहे. तसेच आदित्य रामोळे, निखिल भोई, गणेश गुलाले या विद्यार्थ्यांनी 100 मीटर रिले या वेगवान आणि चुरशीच्या स्पर्धेत उत्तम समन्वय व वेग दाखवत तृतीय क्रमांक पटकावला. त्याच्या या कामगिरीमुळे संघाचा आत्मविश्वास अधिकच वाढला.
याशिवाय या स्पर्धेत आदित्य रामोळे, निखिल आणि राजरत्न पानपाटील या विद्यार्थ्यांनीही उत्स्फूर्त सहभाग नोंदवत महाविद्यालयाचे प्रतिनिधित्व केले. त्यांच्या सहभागामुळे संघभावना, क्रीडासंस्कृती आणि शिस्तीचे दर्शन घडले. या सर्व विद्यार्थ्यांना प्रा दिनेश पवार यांचे मार्गदर्शन लाभले. सर्व यशस्वी विद्यार्थ्यांचे महाविद्यालयाच्या अध्यक्षा श्रीमती योगिता पाटील, सचिव, गणेश पाटील आणि प्राचार्य पंकज चौधरी यांनी कौतुक केले, असून त्यांच्या पुढील क्रीडा व शैक्षणिक वाटचालीस शुभेच्छा दिल्या आहेत. विद्यार्थ्यांच्या या यशामुळे इतर विद्यार्थ्यांनाही क्रीडाक्षेत्रात पुढे येण्यासाठी नवी प्रेरणा मिळाली आहे.