*धामणपे ग्रामस्थांचा शिवसेनेत जाहीर प्रवेश,धामणपे गावच्या विकासाची जबाबदारी माझी-आमदार किरण सामंत*
राजापूर(प्रतिनिधी):-तालुक्यातील धामणपे गावातील अनेक ग्रामस्थांनी आमदार किरण सामंत यांच्या उपस्थितीत शिवसेना पक्षात जाहीर प्रवेश केला. या प्रवेशामुळे गावात शिवसेनेची ताकद अधिक बळकट झाली असून आगामी स्थानिक स्वराज्य संस्थांच्या निवडणुकांच्या पार्श्वभूमीवर या घडामोडीकडे राजकीय वर्तुळाचे लक्ष लागले आहे.
यावेळी बोलताना आमदार किरण सामंत म्हणाले, धामणपे गावच्या सर्वांगीण विकासाची जबाबदारी माझी आहे. रस्ते, पाणीपुरवठा, वीज, आरोग्य, शिक्षण आदी मूलभूत सुविधा प्राधान्याने पूर्ण करण्यात येतील. गावाच्या विकासासाठी शासनाच्या विविध योजना प्रभावीपणे राबविण्याचे आश्वासनही त्यांनी दिले. ग्रामस्थांनी विकासाच्या विश्वासावर शिवसेनेत प्रवेश केल्याचे सांगत आमदार किरण सामंत यांच्या नेतृत्वावर विश्वास व्यक्त केला. या कार्यक्रमाला शिवसेनेचे पदाधिकारी, कार्यकर्ते तसेच ग्रामस्थ मोठ्या संख्येने उपस्थित होते. धामणपे गावातील हा प्रवेश शिवसेनेसाठी बळ वाढवणारा ठरत असून परिसरातील राजकीय समीकरणांवर त्याचा परिणाम होणार असल्याचे बोलले जात आहे.