*गारमाळच्या लेकीने गाठले महापौरपद, अतिदुर्गम आकांक्षित सुरगाणा तालुक्यातून थेट कल्याण डोंबिवली महापालिकेचे नेतृत्व गारमाळची वकील कन्या हर्षाली थविल चौधरी बनली कल्याण डोंबिवलीची महापौर*
सुरगाणा(प्रतिनिधी):-सुरगाणा तालुक्यातील चिराई  घाटमाथ्याच्या पायथ्याशी वसलेल्या, दुर्गम व आदिवासीबहुल गारमाळ या छोट्याशा गावासाठी आज अभिमानाचा क्षण आहे. नावाप्रमाणेच हिरवळीने नटलेले, बनपाडा–मानतोडी धरणाच्या पाण्यावर बागायती शेती करणारे गारमाळ हे तालुक्यातील एकमेव गाव. याच गावातील कन्या अ‍ॅड. हर्षाली राजाराम थविल चौधरी हिची कल्याण–डोंबिवली महानगरपालिकेच्या महापौरपदी निवड झाल्याने अतिदुर्गम व आकांक्षित तालुक्यातील लेकीला थेट महानगराच्या नेतृत्वाची संधी मिळाली आहे. या ऐतिहासिक निवडीमुळे संपूर्ण सुरगाणा तालुक्यासह आदिवासी समाजात आनंदाचे वातावरण असून, हर्षाली थविल यांच्यावर अभिनंदनाचा वर्षाव होत आहे.संघर्षातून घडलेले नेतृत्व
गारमाळ येथील मूळ रहिवासी असलेले हर्षाली यांचे वडील राजाराम थविल हे सुमारे चाळीस ते पन्नास वर्षांपूर्वी रोजगाराच्या शोधात कल्याणजवळील पडघा येथे गेले. त्यांनी महाराष्ट्र राज्य वीज वितरण कंपनीत वायरमन म्हणून सेवा बजावली. नोकरीच्या निमित्ताने कल्याण शहरात स्थायिक झाल्यानंतरही त्यांनी मूळ गावाशी नाळ घट्ट ठेवली.
आई मंदाबाई थविल यांनी घरकाम सांभाळत दोन्ही मुलांच्या शिक्षणाकडे विशेष लक्ष दिले. कष्ट, मेहनत, काटकसर आणि संस्कारांची शिदोरी देत त्यांनी मुलांच्या आयुष्याची घडी बसवली. भाऊ राहुल थविल सध्या मुंबई येथे पोलीस निरीक्षक म्हणून कार्यरत आहेत.
वकिलीपासून समाजकारणापर्यंतचा प्रवास हर्षाली थविल यांनी वकिलीचे शिक्षण पूर्ण करून मुंबई उच्च न्यायालयात खाजगी वकिली प्रॅक्टिस सुरू केली. मात्र केवळ न्यायालयीन कामकाजापुरते न थांबता, समाजकारणाची आवड आणि सर्वसामान्यांच्या प्रश्नांप्रती असलेली तळमळ त्यांना राजकीय व सामाजिक क्षेत्राकडे घेऊन गेली.
लोकहिताच्या कामासाठी त्यांनी शिवसेना (शिंदे गट)च्या माध्यमातून सक्रिय राजकारणात प्रवेश केला. वडवली व अटाळी प्रभागातून सलग दोन वेळा नगरसेविका म्हणून निवडून येत त्यांनी मूलभूत सुविधा, महिला प्रश्न, स्वच्छता, रस्ते, पाणीपुरवठा, आरोग्य व सामाजिक उपक्रमांमध्ये ठोस कामगिरी केली. त्यांच्या कार्यपद्धतीमुळे जनतेचा विश्वास अधिक दृढ झाला.
जनतेच्या विश्वासातून महापौरपद
लोकाभिमुख कामकाज, स्वच्छ प्रतिमा आणि संघटनात्मक बांधिलकी यामुळे जनतेने पुन्हा एकदा त्यांच्यावर विश्वास टाकत, शिवसेना शिंदे गटाच्या वतीने महापौरपदी विराजमान होण्याची संधी दिली. महानगर पालिकेच्या नेतृत्वात प्रथमच गारमाळसारख्या अतिदुर्गम आदिवासी गावातील कन्या पोहोचल्याने हा क्षण ऐतिहासिक मानला जात आहे. कुटुंबाचा सामाजिक पाठिंबा
हर्षाली थविल यांचे पती विजय गोविंद चौधरी हे इंजिनिअर असून कल्याण येथे बांधकाम व्यावसायिक म्हणून कार्यरत आहेत. विजयचे वडील हे सेवानिवृत्त शिक्षक आहेत. कुटुंबाचा ठाम पाठिंबा आणि सामाजिक जाणीव यामुळे त्यांच्या राजकीय वाटचालीला बळ मिळाले आहे.
आदिवासी समाजासाठी प्रेरणादायी यश,
यापूर्वी सुरगाणा तालुक्यातील सतखांब येथील सूनबाई, साक्री तालुक्याच्या विद्यमान आमदार मंजुळा गावित यांनी धुळे महानगरपालिकेचे महापौरपद भूषविले होते. त्यानंतर आता हर्षाली थविल यांच्या निवडीमुळे आदिवासी समाजातील महिलांच्या कार्यकुशलतेच्या कर्तृत्ववाची नवी प्रेरणा निर्माण झाली आहे.
अतिदुर्गम भागातून शिक्षण, कष्ट आणि जिद्दीच्या जोरावर महानगराच्या सर्वोच्च पदापर्यंत पोहोचलेली ही वाटचाल, ग्रामीण व आदिवासी भागातील तरुणींना नवी दिशा देणारी ठरणार आहे या निवडीचे
सुरगाणा शिवसेना शिंदे गटाचे नगराध्यक्ष भरत वाघमारे तालुका अध्यक्ष हरीभाऊ भोये, एकनाथ भोये, गणेश पवार, अर्जुन शिंदे, राहुल जोशी, पुष्पा वाघमारे, अरुणा वाघमारे, राधा वाघमारे, प्रमिला भोये, सचिन आहेर, भगवान आहेर, युवराज जाधव, अरुण पवार, सनी सोमवंशी, गणेश चाफळकर गारमाळचे ग्रामस्थ
सुरेश थविल, विनायक थविल, चरण थविल, सुभाष थविल, प्रकाश थविल आदींनी अभिनंदन केले आहे.