*निंबर्डी ते दरा वाया राणीपूर रस्त्याची दुरावस्था, खड्डे बुजवून रस्ता दुरूस्तीची बिरसा फायटर्सची मागणी*
शहादा(प्रतिनिधी):-शहादा तालुक्यातील निंबर्डी ते सातपिपरी नवागांव दरा पिपरी वाया राणीपूर पर्यंतच्या 12 किलोमीटर रस्त्यावरील खड्डे तात्काळ बुजवून रस्ता दुरूस्ती करा, अशी मागणी बिरसा फायटर्स नंदूरबार संघटनेकडून कार्यकारी अभियंता सार्वजनिक बांधकाम विभाग शहादा यांच्याकडे एका निवेदनाद्वारे करण्यात आली आहे. आमदार राजेश पाडवी यांनी या रस्त्याकडे लक्ष द्यावे, अशी प्रतिक्रिया निंबर्डी  ग्रामस्थांनी केली आहे. शहादा तालुक्यातील निंबर्डी ते सातपिपरी दरा पिपरी वाया राणीपूर या रस्त्याची अत्यंत दयनीय अवस्था झाली आहे. हा स्ता अत्यंत खड्डेमय झाला असून वाहनधारकांना मोठ्या प्रमाणात त्रास होत आहे. हा रस्ता अत्यंत खड्डेमय, धोकादायक झाला आहे. रस्त्यावर मोठ -मोठे खड्डे म्हणजे फूटभर खोल खड्डे  पडले आहेत. सरकारी ग्रामीण रूग्णालय म्हसावद हे राणीपूर येथे स्थलांतरित केल्यामुळे निंबर्डी नवागांव कन्साई इत्यादी गांवातील रूग्णांना आता या रस्त्यावरून राणीपूर येथील रूग्णालयात न्यावे लागते. हा एकमेव मार्ग असल्याकारणाने वाहनांची मोठी वर्दळ असते. ठेकेदार व बांधकाम विभागाने केलेल्या भ्रष्टाचारामुळे या रस्त्याचे बारा वाजले आहेत. रस्त्यात खड्डा की खड्ड्यात रस्ता अशी रस्त्यांची भयानक अवस्था  झाली आहे. त्यामुळे वाहनधारकांमध्ये व प्रवाशांमध्ये संताप निर्माण झाला आहे. या रस्त्यावरून गरोदर महिला, वयस्कर व आजारी नागरिकांना प्रवास नको झाले असून प्रवाशी हैराण झाले आहेत. वाहन चालवतांना खड्डे चुकवताना प्रवाशांचा अपघात होत असून दुखापत होत आहे. या रस्त्यावरून प्रवास करतांना प्रवाशी जीव मुठीत घेऊन प्रवास करत आहेत. या रस्त्यावरून प्रवास करताना कोणत्याही क्षणी अपघात होऊ शकतात म्हणून तातडीने निंबर्डी ते सातपिपरी नवागांव दरा पिपरी वाया राणीपूर 12 किलोमीटर या रस्त्यावरील खड्डे तात्काळ बुजवून रस्ता दुरूस्त करण्यात यावा, अन्यथा बिरसा फायटर्स संघटनेकडून तीव्र आंदोलन छेडण्यात येईल, असा आंदोलनाचा इशारा बिरसा फायटर्स संघटनेकडून देण्यात आला आहे.