*मुख्यमंत्री समृद्ध पंचायत राज अभियान अंतर्गत नवापूर तालुक्यातील ग्रामपंचायतींना क्षेत्रभेट*
नंदुरबार(प्रतिनिधी):-मुख्यमंत्री समृद्ध पंचायत राज अभियान अंतर्गत नवापूर तालुक्यातील ग्रामपंचायतींना क्षेत्रभेट. मुख्यमंत्री समृद्ध पंचायत राज अभियानाच्या प्रभावी अंमलबजावणीसाठी नवापूर तालुक्यातील पळसून, बोकळझर, वावडी, कोळदा व चेडापाडा या ग्रामपंचायतींना नंदुरबार जिल्हा परिषदेच्या ग्रामपंचायत विभागाचे उपमुख्य कार्यकारी अधिकारी  उदयकुमार कुसूरकर तसेच नवापूर पंचायत समितीचे गटविकास अधिकारी देविदास देवरे, विस्तार अधिकारी ग्रामपंचायत यांनी क्षेत्रभेट दिली. या क्षेत्र भेटीदरम्यान अभियानातील मुख्य घटक व उद्दिष्टांनुसार ग्रामपंचायतींमध्ये राबविण्यात येणाऱ्या विविध विकासकामांची सविस्तर पाहणी करण्यात आली.
विशेषतः स्वच्छ व सुंदर गाव, हरित व पर्यावरणपूरक उपक्रम, जलसंधारण व पाणीपुरवठा, डिजिटल ग्रामपंचायत, सीसीटीव्ही सुरक्षा व्यवस्था, सार्वजनिक मालमत्तांचे संरक्षण, महिला व युवक सहभाग, तसेच नाविन्यपूर्ण व लोकसहभागातून राबविलेले उपक्रम यावर भर देण्यात आला. ग्रामपंचायत कार्यालयांची दैनंदिन कामकाज पद्धती, नोंदवही अद्ययावत स्थिती, ऑनलाइन सेवा, कर वसुली, तसेच शासनाच्या विविध योजनांची प्रभावी अंमलबजावणी यांचा आढावा घेण्यात आला. प्रलंबित विकासकामे तातडीने पूर्ण करून गुणवत्तापूर्ण कामे करण्याच्या स्पष्ट सूचना यावेळी देण्यात आल्या.
मुख्यमंत्री समृद्ध पंचायत राज अभियानामुळे गावांचा सर्वांगीण, शाश्वत व लोकाभिमुख विकास साध्य होत असून ग्रामपंचायती अधिक सक्षम, पारदर्शक व आत्मनिर्भर होत असल्याचे प्रतिपादन यावेळी करण्यात आले. सदर क्षेत्रभेटीमुळे नवापूर तालुक्यातील ग्रामपंचायतींना अभियानाची गती मिळून विकासकामांना अधिक चालना मिळणार आहे.