*नंदुरबार येथे सिकल सेल अ‍ॅनिमिया विषयावर एकदिवसीय कार्यशाळा संपन्न*
नंदुरबार(प्रतिनिधी):-नंदुरबार तालुका विधायक समिती संचलित सौ. विमलताई बटेसिंग रघुवंशी कॉलेज ऑफ नर्सिंग, नंदुरबार यांच्या वतीने “सिकल सेल अ‍ॅनिमिया प्रतिबंध व उपचाराची सर्वांगीण दृष्टी” या विषयावर महाराष्ट्रभरातील नोंदणीकृत परिचारिकांसाठी एकदिवसीय राज्यस्तरीय कार्यशाळेचे आयोजन करण्यात आले. या कार्यशाळेत 350 हून अधिक स्टाफ नर्सेसनी सहभाग नोंदवला. सिकल सेल अ‍ॅनिमियाच्या नवीन तपासणी पद्धती व उपचार पद्धतींबाबत अद्ययावत माहिती देणे हा या कार्यक्रमाचा मुख्य उद्देश होता. ही कार्यशाळा दूरदृष्टी असलेले नेते व आमदार चंद्रकांत रघुवंशी तसेच उपाध्यक्ष मनोज रघुवंशी यांच्या मार्गदर्शनाखाली पार पडली. अतिरिक्त जिल्हा आरोग्य अधिकारी डॉ. हृषीचंद्र कोकणी हे प्रमुख पाहुणे म्हणून उपस्थित होते. व्यासपीठावर एन. टी.व्ही.एस. समन्वयक एम. एस. रघुवंशी, डॉ. आशीष निमजे, प्रभारी प्राचार्य भुषण ठोंबरे तसेच महाराष्ट्र नर्सिंग कौन्सिलचे निरीक्षक जितेंद्र चव्हाण यांची उपस्थिती होती.
कार्यक्रमाची सुरुवात दीपप्रज्वलन व प्रमुख पाहुण्यांच्या सत्काराने करण्यात आली. आपल्या मार्गदर्शनपर भाषणात डॉ. कोकणी यांनी नंदुरबार जिल्ह्यात सिकल सेल अ‍ॅनिमियाचा प्रादुर्भाव अधिक असल्याचे नमूद करून, अशा प्रकारच्या कार्यशाळा अत्यंत उपयुक्त असल्याचे सांगितले. तसेच सिकल सेल अ‍ॅनिमियाच्या प्रतिबंधासाठी व आजारामुळे होणाऱ्या मृत्यू व आजारपणाचे प्रमाण कमी करण्यासाठी राबविण्यात येणाऱ्या नवीन शासकीय योजनांची माहिती त्यांनी दिली.
प्रभारी प्राचार्य भुषण ठोंबरे यांनी आपल्या भाषणात सांगितले की, आरोग्यसेवा व्यवस्थेमध्ये परिचारिकांची भूमिका अत्यंत महत्त्वाची असून, त्यांनी सिकल सेल अ‍ॅनिमियाच्या प्रतिबंध व उपचारासंदर्भातील अद्ययावत मार्गदर्शक तत्त्वे आत्मसात करणे आवश्यक आहे.
या कार्यशाळेत एकूण पाच तज्ज्ञ मार्गदर्शन सत्रांचे आयोजन करण्यात आले. डॉ. आशीष निमजे, डॉ. संध्या गजभिये, प्रा. योगिनी सपकाळे, प्रा. अंजली तडवी व प्रा. भुषण वळवी यांनी सिकल सेल अ‍ॅनिमियाच्या विविध पैलूंवर सविस्तर मार्गदर्शन केले.
महाविद्यालयाच्या बी.एस्सी. नर्सिंग विद्यार्थ्यांनी सिकल सेल अ‍ॅनिमियाच्या प्रतिबंधामध्ये आरोग्य कर्मचाऱ्यांची भूमिका दर्शविणारे प्रभावी नाट्य सादरीकरण (रोल प्ले) करून जनजागृतीचा संदेश दिला. कार्यक्रमाचे सूत्रसंचालन नर्सिंग ट्यूटर कु. रोशनी वळवी व भुषण वळवी यांनी केले, तर आभार प्रदर्शन सोनल गावित यांनी केले. कार्यक्रमाच्या यशस्वी आयोजनासाठी मधुर वळवी, शंकर वसावे, वंदना वळवी, ममता कोळी यांच्यासह  महाविद्यालयीन कर्मचारी अशोक धोबी, आकाश शिंदे, विवेक मराठे, अमोल गवाळा व कल्पना चौधरी यांनी मोलाचे सहकार्य केले. कार्यक्रमाचा समारोप “वंदे मातरम्” या राष्ट्रगीताने करण्यात आला.