*पोलीस रेझिंग डे" सप्ताह निमित्ताने नंदुरबार जिल्हा पोलीस दलातर्फे जिल्हयाभरात जनजागृती व सामाजिक उपक्रमांचे आयोजन*
नंदूरबार(प्रतिनिधी):-नंदुरबार जिल्हा पोलीस दलातर्फे "महाराष्ट्र पोलीस वर्धापन दिन" (पोलीस रेझिंग डे) सप्ताह निमित्ताने जिल्हयाभरात विविध सामाजिक, जनजागृतीपर व कल्याणकारी कार्यक्रमांचे आयोजन पोलीस अधीक्षक कार्यालय तसेच विविध पोलीस ठाण्यांचे हद्दीत करण्यात आले आहे. महाराष्ट्र पोलीस दलाच्या गौरवशाली परंपरेचा सन्मान राखत, पोलीस व जनता यांच्यातील विश्वास अधिक दृढ व्हावा, या उद्देशाने सदर कार्यक्रम राबविण्यात येत आहेत. जिल्हा पोलीस अधीक्षक श्रवण दत्त. एस यांच्या मार्गदर्शनाखाली या रेझिंग डे सप्ताहात शालेय व महाविदयालयीन विदयार्थ्यांसाठी मार्गदर्शनपर शिबीरे, पोलीस विभागाची माहिती, कायदा, वाहतुक नियम व सायबर गुन्हयांबाबत जनजागृती, आरोग्य तपासणी शिबीरे, स्वच्छता मोहिम, रक्तदान शिबीर तसेच विविध क्रिडा स्पर्धा व सांस्कृतिक कार्यक्रमांचे आयोजन करण्यात आले आहे. यासोबतच उत्कृष्ट कामगिरी करणाऱ्या पोलीस अधिकारी व अंमलदारांचा गौरव देखील करण्यात येणार आहे. "पोलीस रेझिंग डे" निमित्ताने राबविण्यात येणाऱ्या या उपक्रमांमुळे समाजात कायदा व सुव्यवस्थेबाबत सकारात्मक संदेश जाईल तसेच पोलीस दल व नागरिकांमधील समन्वय अधिक मजबूत होईल, असा विश्वास जिल्हा पोलीस दलाकडून व्यक्त केला जात आहे. नागरिकांना या कार्यक्रमांमध्ये सक्रिय सहभाग नोंदवावा, असे आवाहन जिल्हा पोलीस दलातर्फे नागरिकांना करण्यात येत आहे.