*नायलॉन मांजा गुन्हयातील आरोपीला मांजा विकणारा धुळे येथील नायलॉन मांजा विक्रेता मुद्देमालासह शहर पोलीसांच्या ताब्यात,आरोपीकडून तब्बल 5 लाख 25 हजार रुपयांचा नायलॉन मांजाचा मुद्देमाल हस्तगत*
नंदुरबार(प्रतिनिधी):-3 जानेवारी 2026 रोजी शहर पोलीस ठाण्याचे प्रभारी हेमंतकुमार पाटील यांना मिळालेल्या गोपनिय माहितीचे आधारे नंदुरबार शहर डी. बी. पथकाने शहरातील बाहेरपुरा भागातून एक मांजाचा मुद्देमाल असलेल्या टेम्पोचा शोध घेत त्यातुन प्रतिबंधीत असलेल्या नायलॉन मांजाचे एकुण 60 प्लॅस्टीकचे रिल व वाहन असा मिळुन एकुण 6 लक्ष 70 हजार रुपये किमतीचा मुद्देमाल हस्तगत करुन आरोपी कल्पेश उमेश जावरे, वय- 25 वर्षे, रा.जुनी भोई गल्ली, नंदुरबार यास ताब्यात घेत त्याचेविरुध्द नंदुरबार शहर पोलीस ठाणे येथे गु.र.नं. 03/2026 भा. न्या. संहिता कलम 110, 223 सह पर्यावरण संरक्षण अधि. कलम 4, 5, 15 प्रमाणे गुन्हा दाखल केला होता. सदर गुन्हयात आरोपी कल्पेश जावरे यास न्यायालयाकडून पोलीस कस्टडी रिमांड देण्यात आली होती. सदर आरोपी पोलीस रिमांडमध्ये असतांना त्यास तपासादरम्यान विश्वासात घेऊन सदरचा माल कोठून आणला बाबत विश्वासात घेऊन विचारपुस करता त्याने माल हा धुळे येथील अताउर रहेमान अखलाक अहमद, वय34 वर्षे, रा. अकबर चौक, धुळे याच्याकडुन मागवला असल्याबाबतची कबूली दिली. त्याअन्वये शहर पोलीस ठाण्याचे प्रभारी हेमंतकुमार पाटील यांच्या सुचनेनुसार शहर डी. बी. पथकाचे पोउपनि भुनेश मराठे व स्टाफ अशांनी धुळे येथे जाऊन सदर आरोपी अताउर रहेमान अखलाक अहमद, वय 34 वर्षे, रा. अकबर चौक, धुळे याचा शोध घेतला असता तो मिळुन आला. त्यास गुन्हयाबाबत विचारपुस करता त्याने गुन्हयाची कबूली दिली तसेच त्याचेकडेस अजुन मुद्देमाल आहे अगर कसे बाबत विचारणा करता तो उडवाउडवीची उत्तरे देऊ लागला. त्यास पोलीस पथकाने अधिकचे विश्वासात घेऊन विचारणा केली असता त्याने त्याचे गोडावूनमध्ये माल असल्याचे सांगितले. त्यावरुन पोलीस पथकाने लागलीच त्याचे गोडावून येथे जाऊन तपासणी करता सदर ठिकाणी नायलॉन मांज्याचे 8 खोके ज्याची किंमत 5 लक्ष 25 हजार रुपये असा मुद्देमाल हस्तगत करण्यात शहर डी. बी. पथकास यश मिळाले असुन गुन्हयाचा पुढील अधिक तपास सुरू आहे. सदरची कारवाई नंदुरबार जिल्ह्य पोलीस अधीक्षक श्रवण दत्त. एस, अपर पोलीस अधीक्षक आशित कांबळे, उपविभागीय पोलीस अधिकारी नंदुरबार उपविभाग संजय महाजन यांच्या मार्गदर्शनाखाली शहर पोलीस ठाण्याचे पोलीस निरीक्षक हेमंतकुमार पाटील, डी.बी. पथकाचे पोउपनि भुनेश मराठे, पोहेकॉ पंकज महाले, पोकों भगवान मुंडे, ललीत गवळी व डी. बी. पथक यांनी केली आहे.