*खबरदार नायलॉन मांजाचा वापर केल्यास होणार गुन्हा दाखल, पतंग उडवितांना नागरिकांनी सामाजिक भान ठेऊन कुठल्याही प्रकारे जिवीतहानी होणार नाही याची काळजी घ्यावी व पर्यावरणपूरक उत्सव साजरा करावा जिल्हा पोलीस अधीक्षक श्रवण दत्त. एस यांचे आवाहन*
नंदूरबार(प्रतिनिधी):-नंदुरबार जिल्हयात "मकर संक्रांत" सण मोठया प्रमाणावर साजरा होत असल्याने त्यामध्ये पतंगबाजी करणे हा एक पारंपरिक प्रकार सर्वसामान्यांकडून मोठया उत्साहात खेळला जातो, त्यामध्ये पतंग उडवितांना नायलॉन माजा, चायनिज मांजा किंवा कोणत्याही धोकादायक कृत्रिम मांजाचा वापर हा कायदयाने प्रतिबंधित केला आहे, अशा मांजामुळे मानवी जिवीतास तसेच पशुपक्ष्यांच्या जिवाला गंभीर धोका निर्माण होतो. मागील काही वर्षांमध्ये अशा घातक मांजामुळे अनेक गंभीर जखमा, अपघात आणि मृत्यू अशा घटना घडल्या असुन हे एक गंभीर सामाजिक समस्येचे कारण बनले आहे.
त्यासाठी जिल्हा पोलीस दलातर्फे जिल्हयाभरातील बाजारपेठांमध्ये, गल्लीबोळयांमध्ये तसेच प्रमुख ठिकाणी संयुक्त पथके तयार करुन नायलॉन मांजाची विक्री तसेच वापर करणाऱ्यांविरुध्द कायदेशीर कारवाईची मोहिम सुरु करण्यात आली आहे. त्यामध्ये प्रतिबंधित अशा घातक मांजाची विक्री, साठा, वाहतूक तसेच पतंगबाजी करणाऱ्यांविरुध्द भारतीय न्याय संहिता तसेच पर्यावरण संरक्षण कायदा व इतर प्रचलित कायदयान्वये कठोर कायदेशीर कारवाई करण्यात येणार असल्याची माहिती जिल्हा पोलीस अधीक्षक श्रवण दत्त. एस यांनी दिली आहे. "जिल्हा पोलीस दलातर्फे नागरिकांना आवाहन करण्यात येते की, नागरिकांनी पतंग उडवितांना पर्यावरणपूरक सुरक्षित मांजाचा वापर करावा. मोटारसायकल चालवितांना योग्य त्या सुरक्षेसंबंधी
उपाययोजना करणे गरजेचे आहे. नागरिकांना कुठेही नायलॉन मांजाची विक्री, साठवणुक किंवा वापर आढळल्यास तात्काळ जवळच्या पोलीस ठाण्याला माहिती दयावी. नंदुरबार जिल्हा पोलीस दल नागरिकांच्या सुरक्षेसाठी सदैव तत्पर असून सर्वांनी मिळून सुरक्षित, पर्यावरणपुरक आणि आनंददायी सण साजरा करावा, असे आवाहन करण्यात येत आहे.