*राजापूरातील खड्डेमय रस्त्यांची तत्काळ दुरुस्ती करा अन्यथा उपोषण करावे लागेल-सामाजिक कार्यकर्ते अरविंद लांजेकर यांचा उपोषणाचा इशारा*
राजापूर(प्रतिनिधी):-राजापूर– शीळ– गोठणे–सौंदळ तसेच राजापूर– डोंगर–सागवे या प्रजिमा 68 व 72 महत्त्वाच्या मार्गांची अवस्था दिवसेंदिवस अधिकच दयनीय होत चालली आहे. खोल खड्डे, उखडलेला डांबर, बाजूंनी वाढलेली झाडी आणि अरुंद झालेले मार्ग या सगळ्यामुळे वाहनचालक, विद्यार्थी, पर्यटक आणि स्थानिक नागरिकांना प्रचंड त्रास सहन करावा लागत आहे. प्रवास करणे दिवसेंदिवस धोकादायक होत असून या रस्त्यांवरून जाणारी वाहतूक अक्षरशः जीव मुठीत धरूनच सुरू आहे. या दोन्ही मार्गांवरून कोंढेतड, शेडे, डोंगर, विल्ये, नाणार, कुंभवडे, सागवे, जैतापूर अशा अनेक गावांकडे दररोज मोठ्या प्रमाणात वाहतूक होते. सिंधुदुर्ग आणि जैतापूर प्रकल्प परिसराकडे जाणारा हा महत्त्वाचा मार्ग असल्याने येथे पर्यटकांची सातत्याने ये-जा असते. मात्र रस्त्यावरील खोल व धोकादायक खड्ड्यांमुळे विशेषत: दुचाकीस्वार व रिक्षाचालकांना गंभीर अपघाताचा धोका वाढला आहे. दिवसागणिक वाढणाऱ्या खड्ड्यांमुळे वाहनांची तोल जाऊन अपघात होण्याची शक्यता अधिक झाली आहे. याशिवाय रस्त्याच्या कडेला वाढलेल्या दाट झाडीमुळे दृष्टीआड होणाऱ्या वाहनांचा अंदाज बांधणे कठीण जाते आणि यामुळे छोटे-मोठे अपघात घडत आहेत. स्थानिक नागरिकांच्या मते, सध्या रस्त्यांवरून प्रवास करणे म्हणजे जणू काही धोकादायक अडथळा शर्यतीतून जाण्यासारखे झाले आहे. प्रवाशांच्या पाठीचा त्रास, वाहनांची वारंवार दुरुस्ती, तुटणारी सस्पेन्शन, तडकणारे टायर अशी समस्या कायमस्वरूपी झाली आहे. विद्यार्थ्यांना शाळा–कॉलेजला जाताना त्रास, तर रुग्णवाहिकांना रुग्ण हलवताना वेळेचा मोठा अपव्यय होत असल्यामुळे आरोग्यसेवा देखील प्रभावित होत आहे. या गंभीर परिस्थितीसंदर्भात कोंढेतर्फे राजापूर ग्रामपंचायतीचे माजी उपसरपंच आणि सामाजिक युवक कार्यकर्ते अरविंद लांजेकर यांनी 19 नोव्हेंबर रोजी सार्वजनिक बांधकाम विभागाच्या राजापूर उपविभागातील उपअभियंत्यांना लेखी निवेदन दिले. निवेदनात त्यांनी रस्त्यांवरील खड्डे तात्काळ बुजवून वाहतूक सुरळीत करण्याची, तसेच रस्त्याच्या बाजूची वाढलेली झाडी त्वरित छाटण्याची मागणी केली आहे.
निवेदनात लांजेकर यांनी स्पष्ट इशारा दिला आहे की, “पुढील एका महिन्यात रस्त्यांची दुरुस्ती न केल्यास आणि झाडी न कापल्यास, आम्हाला उपोषणाचा मार्ग अवलंबावा लागेल.” त्यांनी सांगितले की, ग्रामस्थांच्या सहनशीलतेचा अंत होत असून आणखी विलंब सहन केला जाणार नाही. या मार्गांवरून दररोज हजारो लोक प्रवास करतात. अशा परिस्थितीत नागरिकांच्या सुरक्षेला शासन आणि सार्वजनिक बांधकाम विभागाने प्राधान्य दिले पाहिजे. स्थानिक नागरिकांनीही लांजेकर यांच्या भूमिकेला पाठिंबा दर्शविला आहे. रस्त्यांची परिस्थिती दिवसागणिक बिकट होत असल्याने तातडीने दुरुस्तीची कामे हाती घेण्याची मागणी ते सातत्याने करत आहेत. पावसाळ्यापूर्वी किंवा वाहतूक वाढण्यापूर्वी कामे न घेतल्यास परिस्थिती नियंत्रित ठेवणे कठीण होईल, असा इशाराही ग्रामस्थांनी दिला आहे. दरम्यान, सार्वजनिक बांधकाम विभागाकडून निवेदन स्वीकृत करण्यात आले असून संबंधित अधिकाऱ्यांनी लवकरच पाहणी करून आवश्यक ते उपाययोजना करण्यात येतील, असे सांगितले आहे. मात्र प्रत्यक्षात कामे कधी सुरू होतील याकडे आता सर्वांचेच लक्ष लागले आहे. नागरिकांची सुरक्षितता धोक्यात येऊ नये म्हणून रस्त्यांची तात्काळ दुरुस्ती अपरिहार्य असल्याचे स्थानिक प्रशासनावर दबाव वाढत आहे.