*रिंगणे गावच्या श्री हनुमान मंदिराचा 28 नोव्हेंबर पासून जीर्णोद्धार सोहळा*
लांजा(प्रतिनिधी):-तालुक्यातील रिंगणे गावच्या पेडणेकर वाडीतील शतकपूर्तीच्या उंबरठ्यावर असलेल्या श्री हनुमान मंदिराचा जिर्णोद्धार सोहळा 28 नोव्हेंबर ते 30 नोव्हेंबर 2025 रोजी संपन्न होणार आहे. या समयी हिंदु परंपरेने चालत आलेले धार्मिक विधी आणि किर्तन कार्यक्रम असल्याने येथे मंगलमय वातावरण असणार आहे. नावेरी नदीच्या काठावर वसलेले हे हनुमान मंदिर 1927 साली उभारण्यात आले. सुरुवातीला हे मंदिर लाकूड काम, दगडी मातीच्या भिंती अशा स्वरूपाचे होते. नंतरच्या काळात पायाला काळा दगड, भिंतीना जांभा दगड वापरण्यात आला तरी सागवानी लाकडातून साधलेली आकर्षकता आणि मजबूती तशीच ठेवण्यात आली होती. शंभरीकडे वाटचाल करणाऱ्या या मंदिराचा जिर्णोद्धार करतांना कोकणाच्या पर्यावरणाशी मिळते जुळते घेणाऱ्या उतरत्या छपराचे आणि दीर्घकाळ टिकणारे लाकूड वापरतांना त्यावर नक्षीकाम करुन ते अधिक आकर्षक व टिकाऊ करण्याचा प्रयत्न केलेला आहे. हे मंदिर एक वेगळीच कलाकृती असल्याने येथील रस्त्यावरून जाणारा प्रवाशी कुतुहलाने बघू लागला आहे. हे मंदिर उभारले त्याच वर्षांपासून श्री हनुमान जयंती उत्सवाला सुरुवात झाली. रिंगणे गावात असलेल्या राम मंदिरातील श्रीराम नवमीच्या यात्रेपासून नाट्यपरंपरेला सुरुवात झाली. श्री हनुमान जयंतीच्या निमित्ताने परिसरातील लोकांना आणखी एक नाटक बघण्याची संधी मिळाली. येथील रंगमंचावर सुरु झालेली नाट्य परंपरा सुध्दा अव्याहतपणे सुरू आहे. इथे दर्जेदार नाटके सादर करण्याची परंपरा असल्याने इथे नाटक पाहायला आजच्या मोबाईलच्या जमान्यातही प्रेक्षक गर्दी करीत असतात. तीन दिवस चालणाऱ्या जिर्णोद्धार सोहळ्याला मोठ्या संख्येने उपस्थित राहणाऱ्या भाविकांसाठी चहापानापासून,नाश्ता व महाप्रसादाचेही (सर्वांसाठी जेवणाची व्यवस्था) आयोजन करण्यात आले आहे. या सोहळ्याचे आपणही साक्षीदार व्हावे व भक्तीमय वातावरणात आनंद घ्यावा असे श्री हनुमान मंदिर ट्रस्ट कडून आवाहन करण्यात येत आहे.