*एकलव्यची वैष्णवी मानकर राष्ट्रीय स्तरावर*
नंदूरबार(प्रतिनिधी):-महाराष्ट्र राज्य क्रीडा संचालनालय तर्फे आयोजित सातारा येथे 12 ते 14 ऑक्टोबर रोजी घेण्यात आलेल्या राज्यस्तरीय बुद्धिबळ स्पर्धेत नाशिक विभागाचे प्रतिनिधित्व करताना सतरा वर्षाखालील वयोगटात एकलव्य विद्यालयाची विद्यार्थिनी वैष्णवी संदीप मानकर हिने उत्कृष्ट कामगिरी करत राज्यातून पाचवा क्रमांक मिळविला व  आगरतळा येथे होणाऱ्या राष्ट्रीय बुद्धिबळ स्पर्धेसाठी तिची महाराष्ट्राच्या संघात निवड झाली. वैष्णवीला बालपणापासूनच बुद्धिबळ या खेळाची आवड असून तिने कठोर परिश्रम व नियमित दीर्घ सराव याने हे यश प्राप्त केले आहे.
वैष्णवीच्या या उज्वल यशासाठी आज पश्चिम खान्देश भिल्ल सेवा मंडळातर्फे तिचा सत्कार करण्यात आला. संस्थेचे अध्यक्ष डॉक्टर सुहास नटावदकर यांनी वैष्णवीला गौरविले. याप्रसंगी बोलताना त्यांनी सांगितले की वैष्णवी सारख्या विद्यार्थिनी संस्थेचे नाव लौकिक उज्वल करतात आणि संस्थेच्या यशात भर घालतात. वैष्णवीच्या यशाचा संस्थेला अभिमान आहे व अन्य विद्यार्थ्यांनीही वैष्णवी चा आदर्श घेऊन विविध क्षेत्रात उज्वल कामगिरी करून संस्थेचा नावलौकिक वाढवावा असे आवाहनही त्यांनी केले. याप्रसंगी व्यासपीठावर  विद्यालयाचे मुख्याध्यापक सुनील चौधरी, धर्मेंद्र मराठे, टिका पाडवी तथा क्रीडा विभागाचे सुनील पाटील, धोंडीराम शिनगर, वैष्णवीचे पालक संदीप मानकर व कल्पना मानकर उपस्थित होते. विद्यालयाच्या माजी मुख्याध्यापिका सुहासिनी नटावदकर यांनीही वैष्णवीला शुभेच्छा दिल्या. वैष्णवीला विद्यालयाच्या क्रीडा शिक्षकांचे मार्गदर्शन लाभले.