*वृध्दास जिवेठार मारणाऱ्या महिलेस न्यायालयाने ठोठावली जन्मठेप व 15 हजार रुपये दंडाची शिक्षा*
नंदूरबार(प्रतिनिधी):-अक्कलकुवा पोलीस ठाणे हद्दीतील कुंडी- होराफळी गावा दरम्यान कुंडी गावाचे शिवारात कंजाला नदी जवळ फरशीखाली एका पुरुषाचे प्रेत पडलेले दिसले, या माहितीवरुन तेथील कुंडी गावाचे पोलीस पाटील रजनिकांत वसावे हे घटनास्थळी गेले असता तेथे त्यांना अंदाजे 70 वर्ष वयाचा वयोवृध्द पुरुष रक्तबंबाळ अवस्थेत मयत स्थितीत दिसला होता. त्यावरुन पोलीस पाटील वसावे यांनी अक्कलकुवा पोलीस ठाण्यास सदरची दिली. त्यावरुन अक्कलकुवा पोलीस ठाणेचे पोलीस निरीक्षक मेघश्याम डांगे व त्यांचा स्टाफ लागलीच घटनास्थळी हजर झाले. सदर मयताचे जवळील मिळून आलेल्या मोबाईलवरुन पोलीसांना मयताची ओळख पटविण्यास मदत झाली होती. सदर मयताचे नाव धिरुभाई छोटुलाल तडवी, वय-70 रा. बारेजा जि. अहमदाबाद गुजरात असे निष्पन्न झाले होते. त्यान्वये फिर्यादी रजनिकांत वसावे यांचे फिर्यादीवरुन अक्कलकुवा पोलीस ठाणेत अज्ञात आरोपीविरुध्द गु. र.नं. 24/2019, भा. द.वि. कलम 302, 201 प्रमाणे गुन्हा दाखल करण्यात आला होता. सदर गुन्हयाचा तपास अक्कलकुवा पोलीस ठाण्याचे तत्कालीन पोलीस उपनिरीक्षक योगेश राऊत यांनी अत्यंत शास्त्रोक्त पध्द‌तीने केला असता तपासावरुन असे निष्पन्न झाले की, मयत धिरुभाई तडवी हे भाटयाफळी, कोराई येथील रुमाबाई अरुण पाडवी हिच्याकडे राहत होते. त्यांचेत शेतजमीनीच्या पैश्यांवरुन वाद असल्याने रुमाबाई हिने तिच्या घराजवळ राहणारा विष्णु प्रल्हाद कापुरे याचे मदतीने 26 एप्रिल 2019 रोजी वरील ठिकाणी सदर वृध्दास जिवेठार मारल्याचे पोलीस तपासात निष्पन्न झाले होते. आरोपी नामे विष्णु प्रल्हाद कापुरे व रुमाबाई अरुण पाडवी दोन्ही रा. कोराई खापर ता. अक्कलकुवा जि. नंदुरबार यांना तपास अधिकारी यांनी तात्काळ अटक करत तपासाअंती महत्वाचे पुरावे जमा केले होते व आरोपीविरुध्द् मुदतीत दोषारोपपत्र सत्र न्यायालय, शहादा येथे सादर केले होते. सदर खटल्याची सुनावणी अति. सत्र न्यायाधीश, शहादा एस.सी. पठारे यांचे समक्ष झाली. खटल्यामध्ये सरकार पक्षाचे वतीने साक्षीदार तपासण्यात आले. त्यात साक्षीदार, पंच व तपास अधिकारी यांच्या साक्ष महत्वाच्या ठरल्या आहेत. यावरुन सबळ पुराव्याचे आधारे आरोपी क्र. 2 रुमाबाई अरुण पाडवी हिचे विरुध्द गुन्हा सिध्द झाल्याने तिला अति. सत्र न्यायाधीश, शहादा यांनी भा.द.वि.क. 302,201 अन्वये दोषी ठरवत जन्मठेप व 15,000 रुपये दंडाची शिक्षा ठोठावली आहे.
सदर खटल्याचे कामकाज सरकारी पक्षाचे वतीने अति. सरकारी अभियोक्ता अॅड. वाय.बी.मोरे यांनी पाहिले असून पैरवी अधिकारी म्हणून पोउपनि हेमंत मोहिते, पोउपनि हर्षल रोकडे, पैरवी अंमलदार पो.कॉ./1177 देविदास सूर्यवंशी, पो.हे.कॉ./945 शैलेंद्र जाधव, यांनी कामकाज पाहीले आहे. तपास अधिकारी तसेच अति. सरकारी अभियोक्ता यांचे नंदुरबार जिल्ह्याचे पोलीस अधीक्षक श्रवण दत्त. एस.. अपर पोलीस अधीक्षक आशित कांबळे, उपविभागीय पोलीस अधिकारी, अक्कलकुवा सुभाष भोये व जिल्हा सरकारी वकील अॅड. विनोद गोसावी यांनी अभिनंदन केले आहे.