*जिजामाता शिक्षण संस्थेचे संस्थापक अध्यक्ष डॉ.  दिलीप मोरे यांच्या स्मृतिदिनानिमित्त आदरांजली व भव्य रक्तदान शिबिर संपन्न*
नंदुरबार(प्रतिनिधी):-जिजामाता शिक्षण संस्थेचे संस्थापक अध्यक्ष डॉ. दिलीप मोरे यांच्या 25 व्या स्मृतिदिनानिमित्त संस्थेच्या वतीने सामूहिक आदरांजली अर्पण करण्यात आली. या कार्यक्रमाला जिजामाता शिक्षण संस्थेच्या अध्यक्षा सौ. शोभा मोरे, उपाध्यक्ष विक्रांत मोरे, सचिव डॉ. अभिजित मोरे, ॲड. राऊ मोरे व परिवारातील लहान थोर सर्वच सदस्य यांच्यासह नंदुरबार परिक्षेत्रातील विविध राजकीय, सामाजिक, शैक्षणिक, सांस्कृतिक व क्रीडा क्षेत्रातील मान्यवर उपस्थित होते. यावेळी जिजामाता शिक्षण संस्थेच्या अंतर्गत चालणाऱ्या कला, विज्ञान व वाणिज्य महाविद्यालय, औषध निर्माण महाविद्यालय, शिक्षणशास्त्र महाविद्यालय, सेंट मदर टेरेसा, नर्सिंग महाविद्यालय सर्वच प्राचार्य, शिक्षक व शिक्षकेतर कर्मचारी व विद्यार्थी देखील मोठ्या संख्येने सहभागी झाले होते. स्मृतिदिनानिमित्त संस्थेच्या वतीने भव्य रक्तदान शिबिराचे आयोजन करण्यात आले होते. त्याकरिता नंदुरबार जिल्हा रुग्णालय येथील संपूर्ण टीम आलेली होती. या शिबिरात कर्मचारी व विद्यार्थ्यांनी उत्स्फूर्त सहभाग नोंदवला असून 100 पेक्षा अधिक जणांनी रक्तदान केले. कार्यक्रमात उपस्थित मान्यवरांनी डॉ. दिलीप मोरे यांच्या कार्याचे स्मरण करून, त्यांना सामूहिक श्रद्धांजली अर्पण केली. त्यांच्या कार्यातून घेतलेली प्रेरणा समाजासाठी मार्गदर्शक असल्याचेही यावेळी मान्यवरांनी नमूद केले.