*पौष्टिक तृणधान्य उप अभियानांतर्गत ज्वारी बियाण्यासाठी अर्ज करण्याचे आवाहन*
नंदुरबार(प्रतिनिधी):-राष्ट्रीय अन्न सुरक्षा व पोषण अभियानांतर्गत पौष्टिक तृणधान्य (NFSNM-NC) उप अभियान सन 2026-27 मध्ये रब्बी हंगामासाठी शेतकऱ्यांना रब्बी ज्वारीचे बियाणे मिनीकिट विनामूल्य वितरित करण्यात येणार आहेत. या योजनेचा लाभ घेण्यासाठी पात्र शेतकरी व शेतकरी गटांनी महाडीबीटी पोर्टलवर ऑनलाइन अर्ज करावेत, असे आवाहन कृषी विभागामार्फत करण्यात आले आहे. या उपक्रमांतर्गत वैयक्तिक शेतकरी लाभार्थ्यांना एक एकर क्षेत्रासाठी 4 किलो याप्रमाणे रब्बी ज्वारीची एकूण 2 लाख 42 हजार 500 बियाणे मिनीकिट विनामूल्य वितरित करण्यात येणार आहेत. या मिनीकिटमध्ये फुले यशोमती, परभणी शक्ती आणि परभणी सुपर मोती या सुधारित अधिसूचित वाणांचा समावेश आहे. या घटकासाठीचा लक्षांक महाडीबीटी पोर्टलवर उपलब्ध करून देण्यात येणार आहे. पात्र शेतकरी व शेतकरी गटांनी संबंधित घटकासाठी ऑनलाइन अर्ज करून या योजनेचा लाभ घ्यावा.शेतकऱ्यांनी https://mahadbt.maharashtra.gov.in या महाडीबीटी पोर्टलवरील फार्मर लॉगिनद्वारे अर्ज करावेत. अधिक माहितीसाठी संबंधित विभागीय कृषी सहसंचालक, जिल्हा अधीक्षक कृषी अधिकारी, उपविभागीय कृषी अधिकारी किंवा तालुका कृषी अधिकारी कार्यालयाशी संपर्क साधावा, असे आवाहन कृषी आयुक्तालया मार्फत करण्यात आले आहे.