*पार्ल्याच्या आंबेवाडी पब्लिक ब्रिजजवळील सर्व्हिस रोडवर गतिरोधक बसविण्याची अजित गोरुले यांची मागणी*
मुंबई(प्रतिनिधी):-आंबेवाडी पब्लिक ब्रिज ओलांडून हायवे रोज सोसायटीच्या बाजूने विलेपार्ले तसेच अंधेरीच्या दिशेने जाणाऱ्या नागरिकांच्या सुरक्षिततेचा प्रश्न ऐरणीवर आला आहे. पश्चिम द्रुतगती महामार्गालगतच्या हायवे रोज सोसायटीजवळील सर्व्हिस रोडवर वाहनांचा वेग नियंत्रित करण्यासाठी गतिरोधक बसविण्यात यावेत, अशी मागणी सामाजिक कार्यकर्ते अजित सीता गंगाराम गोरुले यांनी केली आहे. आंबेवाडी पब्लिक ब्रिजचा वापर करून या परिसरातून प्रवास करणाऱ्या शालेय विद्यार्थ्यांना, ज्येष्ठ नागरिकांना, महिला तसेच इतर पादचाऱ्यांना सर्व्हिस रोडवरून जाताना अडचणींचा सामना करावा लागू शकतो. या मार्गावरून वेगाने जाणाऱ्या वाहनांमुळे पादचाऱ्यांच्या सुरक्षिततेचा प्रश्न निर्माण होत असल्याने प्रशासनाने वेळीच उपाययोजना करणे आवश्यक असल्याचे गोरुले यांनी निवेदनात नमूद केले आहे. या पार्श्वभूमीवर बृहन्मुंबई महानगरपालिका आयुक्तांना निवेदन देऊन संबंधित ठिकाणाची प्रत्यक्ष पाहणी करावी, रस्त्यावरील वाहतुकीचा वेग आणि पादचाऱ्यांची वर्दळ लक्षात घेऊन नियमानुसार गतिरोधक बसवावेत, तसेच सावकाश वाहन चालविण्याचे सूचना फलक आणि पादचारी सुरक्षा व्यवस्था उभारावी, अशी मागणी करण्यात आली आहे. या निवेदनाची प्रत महाराष्ट्र राज्याचे उपमुख्यमंत्री एकनाथ शिंदे यांनाही देण्यात आली आहे. प्रशासनाने या मागणीची गांभीर्याने दखल घेऊन नागरिकांच्या सुरक्षिततेसाठी तातडीने आवश्यक कार्यवाही करावी, असे आवाहन अजित गोरुले यांनी केले आहे.
नागरिकांच्या सुरक्षिततेला प्राधान्य देऊन संभाव्य अपघात टाळण्यासाठी प्रशासनाने वेळीच पावले उचलावीत, हीच या निवेदनामागील प्रमुख भूमिका आहे.